Эхиримжи йикъара Дагъустандин сиясатдин уьмуьрда лишанлу вакъиаяр кьиле фин давам жезва. 13-майдиз РД-дин Халкьдин Собранидин 56-сессиядал республикадин парламентдин депутатри Мегьамед Рамазанов Дагъустандин Гьукуматдин Председателдин къуллугъдал тестикьарна. Халкьдин Собранидин 90 депутатдикай 81-да ам премьер-министр яз тайинарунин тереф хвена.
Мегьамед Рамазанов РД-дин Гьукуматдин Председателдин къуллугъдал тестикьарун патал адан кандидатура депутатриз Дагъустандин Кьилин везифаяр вахтуналди тамамарзавай Фёдор Щукина теклифна.
«Мегьамед Исрафиловичахъ военный ва государстводин, гражданвилин къуллугърал, гьа жергедай яз, РФ-дин Президентдин векилдин заместитель яз кIвалахдайла къазанмишнавай хъсан тежриба ава. И тежрибади адаз идара авунин, жуьреба-жуьре ведомствойрин арада алакъаяр мягькемарунин месэлаяр чирдай мумкинвал гана. Пешекарвилин жигьетдай вичихъ авай ерияр ада Дагъустанда къати марфар къунин нетижада арадал атай чIуру гьалар арадай акъудунин кIвалахдиз регьбервал гудайла къалурна. Ада республикадин агьалийрихъ галаз алакъаяр хуьнин кIвалахдиз кьетIен фикир гузва, абурулай къвезвай арзайрив жавабдарвилелди эгечIзава, мумкинвилерикай менфят къачуна, абур гьялиз алахъзава…», – къейдна Ф. Щукина.
Ада гьакIни къейд авурвал, дагъустанвийри гьукумдин патай еке рахунар вилив хуьзвач, абуруз республикада авай хци месэлаяр гьялна кIанзава. Ф. Щукинан фикирдалди, исятда региондин Гьукуматдин вилик чIехи везифаяр акъвазнава. Ихтилат тек са гьукумдин органар идара авунин ери хкажуникай физвач, республика дурумлудаказ вилик фидай, агьалийрин яшайиш хъсанардай шартIар тешкилун асул везифайрикай сад я. Сифте чкадал, ада гьисабзавайвал, жергедин агьалийрик къалабулух кутазвай месэлаяр эцигун герек я: кIвалахдай цIийи чкаяр арадал гъун, экономика ва яшайишдин хел вилик тухун, инфраструктура цIийикIа туькIуьр хъувун, милли проектар кьилиз акъудун, Украинада кьиле физвай махсус серенжемдин иштиракчийриз куьмекар гун, гьукумдин органрин вири дережайра жавабдарвал хкажун…
«Къе неинки са кьабулзавай къараррин ери важиблу я, абур кьилиз акъудзавай гьалдал гуьзчивал тухун, жавабдар ксар къайгъударвилелди эгечIун, нетижа гудай кIвалах кьиле тухун генани кар алай месэлайрик акатзава…», – алава хъувуна Ф. Щукина.
Депутатрин вилик рахадайла, Мегьамед Рамазанова ихтибар авунай ва РД-дин Гьукуматдин Председателдин къуллугъдал тестикьарун патал вичин кандидатура теклифунай РД-дин Кьилин везифаяр вахтуналди тамамарзавай Фёдор Щукиназ сагърай лагьана.
«Зун паталди и къуллугъ гьар са дагъустанвидин ва гьукумдин кIвалах дурумлуди, менфятлуди хьуник умуд кутунвай гьар са касдин вилик чIехи жавабдарвал я. КIвалахда чун сифте нубатда тежрибадал, Дагъустандихъ авай мумкинвилерал, чи къуватрал бинеламиш жеда. Зун Гьукуматди менфятлудаказ, ачухдиз, республикадин агьалийрин игьтияжар фикирда кьуна, кIвалахдайвал ийиз алахъда», – къейдна цIийи премьер-министрди.
М. Рамазанован фикирдалди, мукьвал тир девирда Гьукуматдин вилик акъвазнавай асул везифайрикай сад къати марфар къунин нетижада арадал атай чIуру гьалар арадай акъудун я. Ада алава хъувурвал, яд акьалтунин нетижада зиянар хьанвай гьар са агьалидив куьмек агакьарун иллаки важиблу я: инсанди вичихъ авай дердияр, къайгъуяр фикир тагана тан тийизвайди гьиссдайвал.
«Зун ачух кас я, кIвалахдин рекьяй алакъаяр хуьз гьазур я, амма за кIевелай истемишунарда. Къе Дагъустандин гьукумда дегишвилер кьиле физва. И делилдикай менфят къачуна, заз бязи ксар абур алай къуллугърал тур лугьуз тIалабзавай зенгер къвезва. Чирхчиррилай къвезвай зенгер зун паталди тайин къарар кьабулунин жигьетдай бинеламиш жедай делил туш. За сифте нубатда пешекарвилиз, жавабдарвилиз ва намуслувилиз фикир гуда. Кадрийриз талукь месэлаяр гьялдайла, ибур дикъет гудай кьилин ерияр я…», – лагьана М. Рамазанова.
Мегьамед Рамазанован бинеяр ЦIунти райондин Бежта хуьряй я. Адан 42 йис тамам хьанва. Буба Исрафил Рамазанова хейлин йисара КГБ-дин къурулушда кIвалахна. Мектеб акьалтIарайдалай кьулухъ М. Рамазанова ФСБ-дин Академия акьалтIарна. Гуьгъуьнлай ФСБ-дин экономикадин рекьяй хатасузвал таъминардай къурулушда, ДФО-да РФ-дин Президентдин патай тамам ихтиярар ганвай векилдин заместитель яз зегьмет чIугуна. 7-апрелдиз РФ-дин Президент Владимир Путина Мегьамед Рамазановаз Дагъустандиз хъфин теклифна ва адал къати марфарин нетижаяр арадай акъудунин кIвалахрал гуьзчивал тухун тапшурмишна. Гуьгъуьнлай Президентди ам республикадин Гьукуматдин Председатель яз тайинарунин терефни хвена.
Агьмед Магьмудов
