Ватандин ЧIехи дяведа Советрин Армияди къазанмишай Гъалибвал чи уьлкведин тарихда виридалайни кьилин сувар я лагьайтIа, чун гъалатI жедач. Хайи чил патал чанар къурбанд авур кьегьалрин тIварар садрани халкьдин рикIяй акъатдач, абурун экуь къаматар несилрин рикIера эбеди я. ИкI тирди 9-Майдиз Дагъустанда кьиле фейи мярекатри нубатдин сеферда тестикьарна.
Суварин серенжемра РД-дин Кьилин везифаяр вахтуналди тамамарзавай Фёдор Щукина, РД-дин Гьукуматдин Председателдин везифаяр вахтуналди тамамарзавай Мегьамед Рамазанова, республикадин гьукумдин органрин, жемиятдин тешкилатрин векилри, дяведин гьерекатрин иштиракчийри, ветеранри, жергедин дагъустанвийри иштиракна.
Сифте нубатда Фёдор Щукина Махачкъалада Ватан азад авур аскердиз хкажнавай гуьмбетдал, Гьамишалугъ цIун патав, цуьквер эцигна, Ватандин ЧIехи дяведин йисара телеф хьайи кьегьалрин экуь къаматар рикIел хкана. Гуьгъуьнлай ам Яру Армиядин аскерар кучукнавай сурариз фена. Идалай кьулухъ республикадин регьберди Каспийск шегьерда ЧIехи Гъалибвилин 81 йис тамам хьуниз талукьарна тешкилай парадда иштиракна.
Параддилай кьулухъ Фёдор Щукин Ватандин ЧIехи дяведин иштиракчи Юрий Петрухиназ мугьман хьана, адаз Гъалибвилин сувар мубаракна.
Гегьеншдиз РД-дин Кьилин сайтдай кIелиз жеда.
Чи мухбир
