И йикъара машгьур спортсмен, Беларусь Республикадин спортдин­ лайих­лу мастер, Рио-де-Жа­ней­рода кьиле­ фейи Олимпиададин­ къугъунрин буьруьнждин медал­дин сагьиб Жавид Гьамзатов СтIал Сулейманан райондиз мугьман хьанвай. Адан кьилин­ макьсад жаванрихъ галаз гуьруьш­миш хьун, абуруз грекринни римлуй­рин жуьреда кьуршахар кьунай мас­тер-класс къалурун тир.

Райондин кьил Саид Темирхановахъ­ галаз кьиле фейи гуьруьшдал спорт­сменди вичин спортдин рекьикай, агалкьунрикай ва гележегдин планрикай суьгьбетна. Кьиблепатан Дагъустанда кьуршахар кьун вилик тухун патал са жерге меслятар къалурна, спортдин рекье вич патал ватандашри, СтIал Сулейманан райондин агьалийри иллаки­ кьетIен роль къугъвайди къейдна­. Мугь­манди­ грекринни римлуйрин жуьреда кьуршахар кьунай дуьньядин кьве сеферда чемпион Алим Селимо­ван тIва­рунихъ чими келимаяр лагьа­на. Спортдин виниз тир кукIушар муь­тIуь­гъарун патал адан чешнеди вичик руьгь кутурди кьетIендаказ къейдна.

Спортдин рекье къазанмишнавай агалкьунрай, жаванар ватанпересвилин руьгьдаллаз тербияламишунай ва общественный крар активнидаказ кьиле тухунай Саид Темирханова Жавид Гьамзатовав администрациядин патай чухсагъулдин чар ва рикIел аламукьдай пишкешар вахкана.

— Чи спортсменри къазанмишзавай агалкьунрал чна рикIивай дамахзава. Вичин гьакъисагъ зегьметдалди ва гъалибвилералди Жавида неинки Беларусь, гьакI чи вири лезги халкьдин, Россиядин ва Дагъустандин тIварни гьуьндуьр дережадиз хкажзава, — къейдна райондин кьили гележегда адахъ мадни агалкьунар хьун алхишна.

Гуьгъуьнлай Жавид Гьамзатов Курхуьруьн 1-нумрадин СОШ-да жаван спорт­сменрихъ галаз гуьруьшмиш хьана, абур патал мастер-класс кьиле тухвана. Ихьтин тарсуни спортдин рекье камар къачузвайбурун неинки устадвал, гьакI руьгьни хкаждайдал шак алач. Машгьур спортсменди абуруз уьмуьрда бакара къведай къиметлу теклифар ва насигьатар гана. Анжах гьакъисагъ зегьмет, низамлувал (дисцип­лина) ва жуван къуватрихъ инанмишвал спортдин кьакьан кукIушрихъ йигин камаралди тухудай рекьер тирди къейдна.

Шаксуз, ихьтин гуьруьшрихъ акьалтзавай несил патал еке важиблувал ава.

Рагнеда Рамалданова