Малум тирвал, Ватандин ЧIехи дяве кьуд йисуз давам хьана, миллионралди са тахсирни квачир инсанар телефна, гъвечIи аялар бубайрикай, жегьил сусар уьмуьрдин юлдашрикай, диде-бубаяр хайи веледрикай магьрум хьана. Ара датIана кьуд йисуз давам хьайи мусибатри агъзурралди шегьерарни хуьрер чукIурна, заводар, фабрикаяр барбатIна, инсанар недай ризкьидикай магьрумна.
Къанлу дяведи инсанрин рикIера авур сагъ техжедай хирерикай, белки, яргъалди рахаз жеда. Амма кьилинди ам я хьи, Ватандин ЧIехи дяве куьтягь хьана ингье кьудкъад йисалайни гзаф вахт алатнаватIани, Советрин халкьди гьам женгера душмандихъ галаз, гьам далу пата фронт патал чIугур зегьметар рикIелай са вахтундани алатдач.
Жувахъ галаз райондин «Дагъдин булах» газетдин редакцияда кIвалах авур Семедов Абдуладин хизандай пуд кас – Байрам, Магьсум ва Семед душмандихъ галаз женг чIугваз фронтдиз фена. Байрам Москва патал кьиле фейи женгера кьегьалвилелди телеф хьана. Са тIимил вахтундилай Магьсумни телеф хьана лагьай къайи хабар хтана. Хейлин ахнигвийрихъ галаз санал Семедани гъалибвал гваз хайи хуьруьз хтун кьисмет хьана.
1980-йисуз Байраман амукьаяр Москвадин патав, Волоколамскдин шегьре рекьин къерехда, стхавилин сурара секинар хъувурдакай хабар ва сурал ягъай Байраман шикил авай кагъаз Спас Демекскдин райвоенкоматдин ветеранрин Советдин председатель Л. Тренина Абдула муаллимдин хизандал агакьарнай. Шикил ва кагъаз Абдула муаллимди алай вахтундани лап багьа ядигар хьиз хуьзва.
Гьайиф хьи, Магьсумакай хизандиз гьич са делилни амукьнач.
Гъалиб хьана хуьруьз хтай Семеда дяведилай гуьгъуьнин са шумуд йисуз хайи майишатда зегьмет чIугуна, гуьгъуьнлай Бакудин нафтIадин мяденра эвела бурильщикдин куьмекчи яз, ахпа бурильщик, буругъдин мастер яз намуслувилелди зегьмет чIугуна. Ам Азербайжан АССР-дин регьбер Мамед-Жафер Багъирован патай чухсагъулдиз лайихлу хьанай. Саки цIуд йисуз Бакудин нафтIадин буругъра кIвалахайдалай гуьгъуьниз Семед буба хайи хуьруьз хтана, ам саки 15 йисуз колхоздин мал-къарадихъ гелкъвена. 1980-йисуз, пудкъанни цIуд йисан яшда аваз, рагьметдиз фена.
Абдула муаллимдин чIехи кьве стхадини, Мегьамедкьасумани Магьсуда, сада Кеферпатан флотда кьуд йисуз, кьвед лагьайда Украинада кьве йисуз аскервилин пак буржи намуслувилелди кьилиз акъудна, хейлин йисара чи Ватандин жуьреба-жуьре пипIера намуслувилелди зегьмет чIугуна.
Са шумуд йисуз редакцияда кIвалах авур Абдула муаллимдин ахлакьдизни завай лап хъсан къимет гуз жеда. Жергедин корреспондентвилин къуллугъдилай башламишай ада, са-са кIар виниз хкаж жез, отделдин редакторвал, жавабдар секретарвал, редакторвал ва кьилин редакторвал авуна. Алай вахтундани чи къелемдин дустуни чахъ галаз сих алакъа хуьзва.
ЧIехи Гъалибвилин суварин вилик Абдула муаллимдин аскервилин къуллугъдикайни лугьун. Аскервилин пак везифа ада Германияда 1976-1978-йисара кьилиз акъудна. Ам кьве сеферда частунин командирдин патай чухсагъулдиз лайихлу хьанай. Алай вахтунда ам запасда авай офицер я. ЯхцIур йисалай виниз Абдула муаллимди вичин уьмуьр акьалтзавай несилдиз чирвилер ва тербия гуниз бахшнава, и баркаллу кIвалах алай вахтундани давамарзава.
РД-дин культурадин лайихлу ва РФ-дин образованидин гьуьрметлу работник Абдула муаллимдин веледар, Асланбегани Фаика чпин аскервилин буржи намуслувилелди кьилиз акъудна. Инал гъвечIи хва Фаикакай ихтилат давамарин. 2022-йисуз дяведин махсус серенжемдив эгечIайла, и жегьилдиз армиядин жергейриз эвер хгана. Ингье саки кьуд йис я СВО-да иштиракиз. Женгера къалурай кьегьалвилерай Фаик шабагьриз лайихлу хьанва. Адан диде-бубадиз ихьтин велед тербияламишунай частунин командованиди са шумуд сеферда чухсагъулдин чарар рахкурна.
Алван Рамазанова
