20-апрелдилай Россиядин школайра Вирироссиядин ахтармишунрин кӀвалахар башламиш хьанва. ВПР-ар 4-8 ва 10-классра кӀелзавай аялри вахкузва. Гьар са класс ва тарс патал ВПР вахкудай йикъар школади вичи тайинарзава: 20-апрелдилай 20-майдалди.
Сагъламвилин гьалда сергьятвилер авай ученикри ВПР школадин къарардалди, диде-бубайрин разивал аваз ва сагъламвилин гьал фикирда кьуналди кхьизва.
Вири классар патал чарасуз вахкана кIанзавайбурук урус чӀал ва математика ква. Амай тарсар федеральный тешкилатчиди вичи хкязава. Къейд ийин, 6-7-классар патал ВПР-дай обществознание акъуднава, 10-классрин сиягьда лагьайтIа, биологиядин тарс алава хъувунва.
РД-дин образованидин ва илимдин министерстводи хабар гузвайвал, Дагъустанда Вирироссиядин ахтармишунрин кӀвалахар мектебра кIелзавай 278 агъзур аялди кхьизва.
«Лезги газет»
