Жибиндай чуьнуьхна
Махачкъаладин полицейскийри кIуртунин жибиндай 130 агъзур манат пул чуьнуьхунай шак физвай агьали кьуна. Идакай МВД-дин пресс-къуллугъди хабар гузва.
Шегьердин Советский отделдин къуллугъчийри тайинарайвал, Мамедбегован куьчеда авай кIвалин патав 30 йисан яшда авай чкадин агьалиди Хасавюрт райондай тир 49 йиса авай агьалидин кIуртунин жибиндай винидихъ къалурнавай кьван пул чуьнуьхна. Шак физвайда хиве кьурвал, туьквенда авайла, ам са муьштеридихъ галаз таниш хьана. Кассадин патав жибиндай гзаф кьадарда пул акъудна, муьштериди къачур затIунин гьакъи гана, амай пул жибинда хтуна.
Таниш хьайибуру мукьвал алай барда ял ягъун кьетIна. Хъфидайла шак физвайда муькуьди акьван кIевиз къужахламишна хьи, атIадаз вичин кIуртунин жибиндай пул квахьайди гьич чирни хьанач. Пул амачирди адаз анжах кIвализ хъфейла чир хьана ва тадиз полициядиз хабар гана.
Чуьнуьхай пул иесидив вахкуз хьанач, гьикI хьи, шак физвайда а такьатар серфнава.
Хъванвайбур тайинарна
6-апрелдилай 12-апрелдалди госавтоинспекциядин къуллугъчийри пиянвилин лишанар кваз улакь гьалзавай 93 водитель тайинарна. Пиян гьалда аваз автомобиль гьалун тикрарай 12-даз талукь яз РФ-дин УК-дин 264.1-статьядай уголовный делояр къарагъарна.
Къуллугъчийри рикIел хкизвайвал, ички квай затIар хъванвайбуру машинар гьалуниз эсиллагь рехъ гана кIанзавач. Ихьтин гьерекатар гзаф дуьшуьшра мусибатдин агьвалатралди акьалтIзава.
Йисан эвел кьилелай 357 ДТП
Алатай йисан и муддатдив гекъигайла, цIи машинрин аварийрин нетижада инсанар телеф хьунин кьадар 1,6 процентдин тIимил хьанва. Ихьтин делилар алатай гьафтеда РД-дин Гьукуматдин Председатель Абдулмуслим Абдулмуслимова рекьера хатасузвал таъминарунин рекьяй комиссиядин заседанидал малумарна.
Гьа са вахтунда ДТП-рин кьадар шазандалай артух хьанва. ИкI, йисан эвел кьилелай 1-апрелдалди Дагъустанда 357 авария арадал атана, нетижада 61 кас кьена, 510-дал жуьреба-жуьре хирер хьана.
«Лезги газет»
