И йикъара СтIал Сулейманан райондин Курхуьруьн юкьван школада, Россиядин Игит Султан Сулейманован экуь къаматдиз бахшна, 2012-2015-йисара ханвай жаванрин арада азаддаказ кьуршахар кьунай республикадин сад лагьай турнир кьиле тухвана. Райадминистрациядин спортдин, туризмдин ва жегьилрин крарин рекьяй комитетди райондин образованидин управленидихъ галаз санал тешкилнавай и акъажунра республикадин жуьреба-жуьре районрайни шегьеррай тир 100-далай виниз жаванри заланвилин 12 категориядай гьасиррал чпин устадвал къалурна.
Турнир ачухуниз талукьарнавай шад мярекатдал райондин кьил Саид Темирханов, Игитдин буба Сулейман Сулейманов, Курхуьруьн советдин кьил Руслан Гьажалиев, райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидов ва масабур рахана. Абуру жаванрин тIварунихъ чими келимаяр лагьана, Султан Сулейманован игитвал къейд авуналди, ам рикIел хкана.
Турнирда кIвенкIвечи чкаяр кьур жаванриз махсус чIулар, кубокар, медалар ва грамотаяр гана.
Рагнеда Рамалданова
