18-апрелдиз СтIал Сулейманан район­дин Эминхуьруьн юкьван мектебда ирид лагьай сеферда лезги чIалай рес­публикадин дережада авай олимпиада кьиле фена. Ам Кьиблепатан Дагъус­тандин районрин, шегьеррин мектебра 10-классра кIелзавай аялрин арада «Лезги газетдин» редакцияди, «Леки» фондуни, ФЛНКА-ди СтIал Сулейманан райондин администрация­дин куьмекдалди тешкилнавай.

Алай йисуз «чирвилерин акъажунра» Ахцегь, Докъузпара, Мегьарамдхуьруьн, СтIал Сулейманан, Кьурагь, Хив районрай ва Дербент шегьердай 46 аялди иштиракна. Абуру тест-диктант, лезги чIалайни эдебиятдай тестер, синтаксисдин, морфемайрин разборар ва маса тапшуругъар тамамарна.

Олимпиададиз атанвай гьуьрметлу мугьманрин арада «Лезги газетдин» редакциядин, «Леки» фондунин, ФЛНКА-дин векилрилай гъейри, СтIал Сулейманан райондин кьил Саид Темирханов, РД-дин Кьилин меслятчи Энрик Муслимов, жемиятдинни сиясатдин машгьур векил Мамед Абасов, сейли меценат Нариман Гъазалиев, РД-дин писателрин союздин лезги секциядин регьбер Максим Алимов, писатель Сардар Абил, «Леки» клубдин регьбер Рафик Агъамирзоев, «Вахтар ва инсанар» передача кьиле тухузвай журналист Владик Батманов, машгьур духтур Рамазан Керимов, Голландияда яшамиш жезвай чи ватанэгьли, юрист Темирхан Мисриханов, тренер Магелан Саидов, «Лекьрен муг» этнолагердин регьбер Садикь Гьасанов ва масабур авай.

Олимпиададин вилик мугьманар ва вири иштиракчияр Эминхуьруьн юкьван мектебдин директор Рагьман Османова­ тебрикна. Гуьгъуьнлай «Лезги газетдин» кьилин редактор Мегьамед Ибрагьимовани «Леки» фондунин векил Рус­лан Мегьдиханова олимпиададин шар­тIарикай лагьана.

Вилик йисара хьиз, цIини гъалибчияр патал 15 чка тайинарнавай. Пишкешрин фондуни 270 агъзур манат тешкилна. Жюридик Мегьамед Ибрагьимов ва адан заместитель Куругъли Ферзалиев квай. КIвалахриз баллралди къимет гана.

Нетижада 1-чкадиз Эминхуьруьн юкьван  мектебдин ученица Нурият Нурмето­ва лайихлу хьана (муаллим – Жамиля Жигерова). 2-чка Кьурагь райондин­ КIирийрин хуьруьн Э.Салигьован тIварцIихъ галай юкьван мектебдин ученик Эльмар Къагьирова кьуна (муаллим – Мурад Рагьимханов), 3-чка – Мегьарамдхуьруьн райондин Хожа-Къазмайрин юкьван мектебдин ученица Суна Аслановади (муаллим – Саида Шихрагьимова), 4-чка – Мегьарамдхуьруьн райондин Кчун-Къазмайрин юкьван мектебдин ученица Ханум Къурбановади (муаллим – Раксана Муслимова), 5-чка – Мегьарамдхуьруьн райондин Гъепцегьрин хуьруьн юкьван мектебдин ученица Гуьлкелем Афизовади (муаллим – Рутмина Бабаева), 6-чка – Мегьарамдхуьруьн райондин Ярагъ-Къазмайрин юкьван мектебдин ученик Арсен Сейфединова (муаллим – Сивиль Мегьамедовна), 7-чка – Мегьарамдхуьруьн райондин Билбил-Къазмайрин юкьван мектебдин ученица Къизханум Туьменовади (муаллим – Мая Жабраилова), 8-чка – Мегьарамдхуьруьн райондин КьепIир-Къазмайрин юкьван мектебдин ученица Алия Шагьпазовади (муаллим – Расмия Тагьирбегова), 9-чка — Мегьарамдхуьруьн 2-нумрадин юкьван мектебдин ученица Зухра Абдулмежидовади (муаллим – Фатима Мирзегьасанова), 10-чка – Мегьарамдхуьруьн райондин Уружбайрин хуьруьн юкьван мектебдин ученик Зураб Темирханова (муаллим – Эркиназ Самурханова), 11-чка – Мегьарамдхуьруьн райондин Бут-Къазмайрин юкьван мектебдин ученица Мадина Гьажиевади (муаллим – Заира Мухтарова), 12-чка – Ахцегь райондин ЦIийи Усуррин юкьван мектебдин ученица Фатума Гьамидовади (муаллим – Роза Букарова), 13-чка – СтIал Сулейманан райондин Зизик­рин хуьруьн юкьван мектебдин ученица Камила Аразхановади (муаллим – Салигьат Гьажибалаева), 14-чка – СтIал Сулейманан райондин ЦIийи Макьарин хуьруьн юкьван мектебдин ученица Анжела Хийирбеговади (муаллим – Рамиз Идрисов), 15-чка – Мегьарамдхуьруьн райондин Самурдин юкьван мектебдин ученица Камила Велихановади (муаллим – Жамиля Рагьимова).

Гъалиб хьайи аялриз дипломар, «Лезги газетдин» кьилин редактордин замес­титель Куругъли Ферзалиева акъуднавай хайи чIалан кIватIалар ва пулунин пишкешар гана. Кьилди къачуртIа, 1-чкадай 30 агъзур манат пул гана, 2-чкадай – 25 агъзур манат, 3-чкадай – 20 агъзур манат; 4-чкадай – 18 агъзур манат; 5-чкадай – 16 агъзур манат; 6-чкадай – 14 агъзур манат; 7-чкадай – 12 агъзур манат; 8-чкадай – 10 агъзур манат; 9-чкадай – 8 агъзур манат; 10-чкадай – 6 агъзур манат; 11, 12, 13, 14, 15-чкайрай – гьар садаз 5 агъзур манат.

Дипломризни пулунин пишкешриз гъалибчийрин муаллимарни лайихлу хьана: 1-чка кьур ученицадин муаллимдиз – 10, 2-чка кьур ученикдин муаллимдиз – 8, 3-чка кьур ученицадин муаллимдиз – 6, амай 13 гъалибчидин муаллимриз гьар садаз 5 агъзур манатдин кьадарда аваз пулунин пишкешар гана. Къейд ийин хьи, олимпиадада иштиракай амай вири аяларни дипломризни ктабриз лайихлу хьана.

Жюридин членри олимпиададин кIва­лахриз къимет гузвай чIавуз Максим Алимовани Сардар Абила иштиракчийрин арада виридалайни хъсан шиирар кIелунай конкурс кьиле тухвана ва гъалибчийриз дип­ломарни ктабар гана.

Агьмед  Магьмудов