И йикъара интернетдай малум хьайивал, Кьурагь райондин Арабляр хуьряй тир, Сургутда яшамиш жезвай ва, икьрар кутIунна, пуд йисуз дяведин махсус серенжемда иштиракзавай Теймур Разахановаз алай йисан 14-февралдиз РФ-дин Президентдин Указдалди Жукован медаль ганва. И малумат адан хуьруьнви Абдула эцигнавай.

Абдулавай кьегьалдин телефондин нумра къачуна, зун Теймурахъ галаз алакъадиз экъечIна.

Разаханов Теймур Гьажимегьаме­дович 1990-йисуз дидедиз хьана. Хизанда пуд велед авай – кьве рушни­ са гада. Хуьруьн школада 9-класс акьал­тIарай 2007-йисуз адан дах рагьметдиз фена. Кьилин образование къачудай фикир авай жавандин хиве, хизанда гъвечIиди ятIани,  кIвалин иесидин везифаяр гьатна… ЧIехи вах гъуьлуьз фенвай. ГъвечIи вах кIвале амай. Дидедизни вахаз куьмек гана кIанзавай.

Яргъариз физ тахьуниз килигна, Теймур, механик-водителвилин пешедай чирвилер къачуз, Белиж поселокдин СПТУ-дик экечIна. КIвалин дердияр хиве гьатнавай жаванди зайифвал къалурнач. Ада зегьмет чIугуна, СПТУ-дани кIелиз, 10-11- классра кIелун давамарна. Хизандиз куьмек гун патал гъилик акатай гьар жуьре кIвалахарни ийиз хьана.

2010-йисуз адаз Россиядин ар­миядин жергейриз эверна. Ам Рязандин ВДВ-дин частуниз акъатна. Са йи­суз­ къул­лугъна хтайдалай гуьгъуьниз ада­ хуьре са тIимил кIвалахар авуна. 2012-йисуз вахни динжарна.

Чкадал кутугай кIвалах тахьуниз килигна, жегьил Санкт-Петербургдиз фена. Ина ада гагь улакьрал, гагь карчийрин тешкилатра жуьреба-жуьре кIва­лахар авуна. Мехъерилай гуьгъуьниз­ хьайи буржарни алудна. 2015-йисуз танишрин теклифдалди ам Сургутдиз фена. Амай чкайриз килигайла, шартIар тIимил кьван четин ятIани, ина зегьметдиз килигай вижевай гьакъини гузвай. 2017-йисуз ам эвленмиш хьана. Са куьруь вахтундилай ам вичин уьмуьрдин юлдашни галаз  Сургутдиз хъфена.

2023-йисан 25-февралдилай Теймура дяведин махсус серенжемда иштиракзава.

Махсус полигондал военный инст­рукторрин гуьзчивилик кваз женгинин рекьяй алава чирвилер къачур Теймур авай десте Луганскдин областдин Кременная шегьердиз ракъурна. Ина ам 27-полкунин гьужумдай батальондиз акъатна.

– Аллагьдиз шукур, муьжуьд вацра иштиракай женгера зун сагъ-сала­матдиз амукьна, – лугьузва Теймура. –  Амма октябрдин вацра миллетчийри чи дестедал вегьей хьиткьиндай шейини зал хирер авуна.

Госпиталда духтурри варзни зуралай ам кIвачел ахкьалдарна. Гила ам артиллериядин частуниз ракъурна, яни хиве кьезил кIвалахар туна.

Ахпа Теймур 348-полкунин гьужумдай дестедик кутуна. 2025-йисан но­ябр­диз Донецкдин мулкуна миллетчий­рин нубатдин даяхдал гьужумзавай­ вахтунда ам авай дестедал душмандин дронди гьужумна. Къуьнелни кIвачел  хирер хьана, мад госпиталдиз аватна. Кьве варзни зуралай ам госпиталдай аххъайна.

КIвализ хъфенайтIани жезвай, амма младший сержант Теймура СВО-да иштиракун давамарна.

Алай йисан январдиз ам мад гос­пи­талдиз аватна. Самолетдин жуьредин­ «Баба ягади» ахъаяй гуьлледи кьве кIвач­ни яна. Са кIвач хана, муькуь­ кIва­чин нервдиз тади гана, бегьем къе­къвез жезвач. Алай вацран юкьвара операция ийидайвал я. ЯтIани викIегь хва руьгьдай аватнавач, операция ийидалди, объектар хуьз, ада къуллугъ давамарзава.

Вилик эцигнавай везифаяр лайихлудаказ тамамарунай, са рехнени квачиз къуллугъ авунай ва женгера къалурай кьегьалвилерай Теймур Суворован, Жукован ва «Махсус серенжемдин иштиракчи» медалриз лайихлу хьанва.

Теймур алатай йисуз Сургутдин международный инновациядин университетдин базадал ачухнавай колледждик юриспруденциядай кIелиз экечI­нава.

Уьмуьрдин юлдаш Сабринадихъ га­лаз санал Теймура пуд хциз тербия гуз­в­а. Абурукай гъвечIидан кьве йисни зур я.

Чи мурад дуьньяда ислягьвал хьун, миллетчийрал гъалибвал къазанмишна, Теймур вичин хизандин патав сагъ-саламатдиз хтун я.

Къагьриман  Ибрагьимов