14-апрелдиз Дагъустан Республикадин Кьил Сергей Меликов журналистрихъ, блогеррихъ ва жемиятдин векилрихъ галаз гуьруьшмиш хьана. Рахунрив эгечIнамазди, республикадин Кьили тIебиатдин бедбахтвили республикадиз гайи зиянар алудун патал гьукумдин органри кьабулзавай серенжемрикай лагьана.
– Чна тешкилнавай гьукуматдин комиссиядин къалурунриз килигна, чи вилик эцигнавай везифаяр активнидаказ кьилиз акъудзава. Гьукуматдин комиссиядик гьукумдин вири органрин векилар ква.
Къенин юкъуз чна тамамарна кIанзавай кIвалахар лап чIехибур я. Чавай къе лугьуз жедач хьи, кьетIен гьалариз талукь вири крар авуна куьтягьнава. ТIебиатдин бедбахтвилин дуьшуьшар маса районрани арадал атанва. Дагълар уьцIенва, кIвалер, хуьрер живедин маргъалрик акатнава.
Сергей Меликова къейдна хьи, гьукумди сифте нубатда четин гьалара гьатнавай инсанриз куьмек гуз чалишмишвалзава. И сеферда хьайи хьтин тIебиатдин бедбахтвилер, селлер, живедин маргъалрик акатун вилик вахтара хьайиди туш.
Сергей Меликова зиянар хьанвай агьалийриз гузвай куьмекдин гьакъиндайни малумат гана. Адан гафаралди, зиян хьун тестикьарнавай агьалидиз са сеферда гузвай куьмек 15675 манатдиз барабар я. Эменнидин са пай пуч хьунай – 78735 манат, эменни михьиз пуч хьунай – 156750 манат гузва. Инсандин бедендиз хасаратвал ганвай вахтунда – 627000, хасаратвал кьезил тирдаз 513,5 агъзур манат гудайвал я, инсан кьейи дуьшуьшда – 1млн 567 агъзур манат.
С. Меликова къейд авурвал, и кьадар пулар Россиядин Федерациядин нормативный базадин бинедаллаз тайинарнава. Зиянар хьанвай ксаривай яшайишдин рекьяй хуьдай органриз МФЦ-дин ва «Госуслуги» порталдин куьмекдалди арза гуз жеда.
Са сеферда гузвай куьмек къачун патал кьетIен гьалар тайинарнавай йикъалай са вацран вахтунда арза гана кIанда. Пуч хьанвай эменнидай эвездин пулар къачун патал 6 варз, инсан кьейи дуьшуьшда гзаф вахт герек къведа. Агьалийрин арзайриз 11 йикъан вахтунда килигда.
Ганвай зиянар шегьеррин ва районрин администрацийрин пешекарри тайинарда ва абурун бинедаллаз зиянар хьанвай инсанрин сиягьарни туькIуьрда.
Республикадин «Лезги газет» газетдин кьилин редактор Мегьамед Ибрагьимован суалдиз талукь яз Сергей Меликова ихьтин жаваб гана:
– Республикадин хейлин районра кьетIен гьалар арадал атанва. Гзаф чкайра рекьер, муькъвер тухванва, электроэнергиядикай хкатнава. Гьа и йикъара кьиле тухвай совещанидални дагълух хуьрера арадал атанвай месэладиз фикир гана, – лагьана С. Меликова. – Махачкъалада, Адильотарда ва Мамедкъалада хьиз, чIуру гьалар ЦIунтIи, Дахадаев, Агъул, Докъузпара, Къули, Лак, Буйнакскдин, ЦIумада районра ва Бежтадин участокдани арадал атанва. Анра дагълар, кьвалар уьцIезва, живедин маргъалар гьерекатдик акатзава.
ТIебиатди вич гьикI тухудатIа лугьун четин я. Живедин маргъалри басмишай кIвалер, инсанар хкудзавай пешекарарни хаталувилик акатзава. ЯтIани абуру чпелай алакьдай вири крар ийизва, – лагьана С. Меликова.
Региондин Кьили къейд авурвал, гъиле-гъил аваз дагълух районриз санитарный авиация рекье твадай мумкинвал жезвач. И кардиз чилин цифеди, живеди, гарарини манийвалзава. Гьавиляй кIеве гьатайбуруз чкадин инсанрикай куьмекдай дестеяр тешкилна.
Дагъустандин Кьили ветеринариядин рекьяй комитетдал, хуьруьн майишатдин ва суьрсетдин министерстводал, хуьрерин администрацийрин кьилерал эвездин пулар гун патал пуч хьанвай гьайванрин кьадарар тайинарун тапшурмишна. КьетIен фикир кьенвай гьайванар садакай масадак акатдай азарар пайда тахьун патал махсус чкайра кучукунин месэладизни гана.
«Дагестанская правда» газетдин кьилин редактор Бурлият Токболатовадин суалдиз жаваб яз, Сергей Меликова лагьана хьи, цик акатнавай бязи хуьрер хатасуз чкайрал кутун хъувунин месэладизни килигзава.
Хийир Эмиров
