14-апрелдиз РД-дин Гьукуматдин Председатель Абдулмуслим Абдулмуслимова республикада авай АЗС-рин (автозаправочные станции) регьберрихъ галаз гуьруьш кьиле тухвана. Мярекатда «Нова-Ойл», ПАО «Татнефть», «VNK», «ASKO», Нефтяник, Зодчий, Террера, «ULTRA» и «F-1» АЗС-рин, гьукумдин са жерге органрин векилри иштиракна. Гуьруьшдал веревирд авур асул месэлайрикай сад, тIебиатдин мишекъат шартIарихъ галаз алакъалу яз, Дагъустанда кьетIен гьаларин режим кардик кутунвай вахтунда кудай ва ягъламишдай затIар маса гузвай къиметрихъ галаз алакъалу тир.

Вичин рахунра премьер-министрди АЗС-рин регьберриз, республикада арадал атанвай четин гьалар фикирда кьуна, кудай ва ягъламишдай затIарин къиметар хкаж тавуниз эвер гана.

– Къе чи вилик умуми месэла акъвазнава – кьетIен гьаларин режим кардик кутунвай вахтунда, бине авачиз, кудай ва ягъламишдай затIарин къиметар хкаж хьуниз рехъ тагун, – лагьана А.Абдулмуслимова. – Къенин юкъуз кудай ва ягъламишдай затIар анжах са метягь туш, стратегиядин метлеб авай ресурс я. Адалай махсус къуллугърин, абуру менфят къачузвай улакьрин кIвалах, яд акьалтунин нетижада четин шартIариз аватнавай агьалийрин яшайиш аслу я. За куь жавабдарвилик ва куьнни и кардин гъавурда акьазвайдак умуд кутазва, кьилинди республикадин агьалияр патал кудай ва ягъламишдай затIарин къиметар тIем акакьдайбур яз хуьн я, — алава хъувуна Гьукуматдин Председателди.

Гуьгъуьнлай совещанидал рахайбуру А.Абдулмуслимован эвер гунин тереф хвена ва чпи, тIебиатдин бедбахтвал себеб яз, зиянар хьанвай агьалийриз гузвай куьмекрикай суьгьбетна.

Гегьеншдиз РД-дин Гьукуматдин сайтдай кIелиз жеда.

Чи мухбир