Къайгъударвал патал

Целди таъминарунин рекьяй РД-дин сад тир операторди Дербент, Дагъустандин Огни шегьеррин ва Дербент райондин агьалийриз, республикада арадал атанвай гьаларихъ галаз алакъалу яз, сагъламвал хуьниз талукь тир са жерге серенжемар кьилиз акъудуниз эвер гузва.

Кьилди къачуртIа, яшайишдин са сетда 11-апрелдиз эцигнавай малуматда чешмеди раижзавайвал, республикадин мулкарал гзаф къвалар къуникди ва селлер атуникди яд хуьдай гьамбарханадиз ва целди таъминардай къурулушдиз кьацIай хейлин яд атанва. И кар агьалийрин сагъламвал патал хаталу хьун мумкин я.

Идахъ галаз алакъалу яз, «ЕОРД» тешкилатди («Единый оператор Респуб­лики Дагестан в сфере водоснабжения и водоотведения») хатасузвал таъминарунин макьсаддалди крандай къвезвай яд ишлемиш тавун меслятзава. ТIуьн гьазу­рун, емишар, салан майваяр чуьхуьн, гьакI­ни аялрин тIуьн гьазурун патал ругун тавунвай яд ишлемиш тавунин патахъай тагькимарзава. Къейдзавайвал, яд ишлемишдалди вилик, ам чарасуз ргана кIанда. Мумкинвилериз килигна, къапара авай (бутилированный) яд ишлемишуниз эвер гузва.

Гьа са вахтунда хабар гузвайвал, алай вахтунда Дербент, Дагъустандин Огни шегьеррин ва Дербент райондин мулкарал махсус улакьра аваз хъвадай яд гъун тешкилнава. Идалайни алава, агьалияр къапара авай хъвадай целди таъминарунин кIвалахни кьилиз акъудзава.

Пешекарри акьалтIай режимда аваз кIвалахзава, датIана цин еридал гуьзчивал­ тухузва. Гьалар къайдадик кухтун патал герек тир вири серенжемар кьабулзава.

Чешмеди агьалийриз арадал атанвай гьаларив гъавурда акьуналди эгечIуниз, игьтиятвилин серенжемрал ва меслятрал амал авуниз эвер гузва.

Меслят къалурзава

Селлер атай вахтунда ратарин инфекция – дизентерия, ротавирус, гепатит А — акатунин хаталувал артух жезва. Идакай РД-дин ЦУР-дин телеграм-каналди хабар гузва.

Инфекцийрикди начагъ хьунин кьилин лишанар ихьтинбур я: къене тIалар гьатун, экъуьчун, зайифвал, ифин акьалтун… Гепатит А акатайла, кьери яд — мичIи ва хамунал хъипивал (желтушность) пайда жеда.

Хабар гузвайвал, ифин акьалтун, гзаф экъуьчиз, бедендик яд тIимил хьун (кьурувал, цихъ къанихвал) хьайитIа, гьакIни аялрал са гьихьтин хьайитIани лишанар пайда хьайи дуьшуьшра тади гьалда духтурдин патав фена кIанда.

Гьа са вахтунда чешмеди начагъвилин вилик пад кьадай чараяр (профилактика) патал анжах ргай ва я къапара авай (бутилированный) яд хъуниз, гъилер чуьхуьниз ва селлер атуникди кьеженвай продуктар тIуьн тавуниз эвер гузва…

Арада мензил аваз

«Газпром межрегионгаз Махачкала» тешкилатдин генеральный директор Ризван Мурадован гафаралди, алатай йисуз­ компанияди газдин счетчикди къалурза­вай рекъемар агакьарун патал алава тир арада мензил авай сервисар кардик кутунва. Идакай «Дагъустан патал газ» те­леграм-каналди хабар гузва.

Кьилди къачуртIа, «Газфотоконтроль» сервисди, счетчикдин шикил яна, а рекъе­мар газ агакьарзавай компаниядиз арада мензил аваз рекье твадай мумкинвал гузва. ГьакIни гила компаниядин «ифей линияда» (8-800-200-98-04) газдин счетчикди къалурзавай рекъемар «ванцин ботди» (голосовой бот) кьабулзава. Газдин счетчикди къалурзавай рекъемар «Мой газ» ва я «Газ онлайн» приложенийрин куьмекдалдини рекье тваз жеда.

Идалай вилик и чешмеди, счетчикди къалурзавай рекъемар вахтунда агакьаруналди, абонентди пул анжах гьа­къикъат­да ишлемишнавай газдай гузвай­дакай раижнай. Амма рекъемар агакьарунин муддат ачухун хьайитIа, гузвай гьа­къи­дал­, яша­йиш­дин дараматдин майдан фикирда кьуна, газдин кьадар ракъурзава. И жуьреда гьисаб кьиле тухун газ ишлемишзавай касдиз хийирлу тахьун мумкин я.

Къейдзавайвал, санлай къачурла эхи­римжи пуд йисан къене нормативдин гьакъидин кьадар 1,3 миллиард кубо­метр­див агакьна тIимил хьанва.

Телеграм-каналди раижзавай делилралди, эгер газ ишлемишзавай касди­ гьар вацра 20-йикъалай 25-йикъалди ресурсдалди таъминарзавай идарадиз счетчикдин рекъемар рекье твазвачтIа, и дуьшуьшда сифтегьан пуд вацра газ ишлемишунай гьакъидин кьадар вацра ишлемишзавай газдин юкьван гьисаб фикирда кьуна тайинарда, кьуд лагьай вацралай – гьакъидин кьадар нормативдал асаслу яз акъудда.

Гьазурайди – Муса  Агьмедов