Си Цзиньпинан теклифар
КНР-дин председатель Си Цзиньпина Ближний Востокда къалмакъал секинарун патал кьуд теклиф малумарнава. Идакай Китайдин Центральный телевидениди хабар гана.
Ихтилат ислягьвилелди яшамиш хьуникай, тIвар кьунвай мулкара авай уьлквейрин аслу туширвилиз, кьилдинвилиз гьуьрмет авуникай, хатасузвал хуьникай физва.
«Персидский заливдин ва вири Ближний Востокдин уьлквейрин арада алакъаяр хъсанарунин тереф хуьн герек я», – лагьана Китайдин регьберди.
ГьакIни ада Ближний Востокдин государствойрин аслу туширвилиз, мулкарин битаввилиз халисандаказ гьуьрмет авун важиблу яз гьисабзава.
«Хатасузвал еримлу хьун патал эвелимжи шартI я, еримлу хьун хатасузвилин заминвал я», – алава хъувуна ада.
Къейд ийин, алатай гьафтеда США-дин президент Дональд Трампа Вашингтонни Тегеран кьве гьафтеда ягъунар акъвазарунин патахъай икьрардал атанва лагьанай. 11-апрелдиз Исламабадда Америкадинни Ирандин векилрин арада рахунар кьиле фена, амма икьрар кутIундай меслятдал атанач.
Эвез хъувун истемишзава
Тегеранди Саудиядин Аравиядивай, ОАЭ-дивай, Катардивай, Бахрейндивай ва Иорданиядивай абуру «Ирандиз акси яз Америкадини Израилди тухвай дяведа иштиракунай» зарар эвез хъувун истемишзава. «IRNA» чешмеди хабар гузвайвал, ихьтин фикир ООН-да Ирандин гьамишан векил Амир Саид Ираваниди малумарна.
«И вад уьлкведи Ирандин вилик чпин международный мажбурнамаяр чIурнава, идахъ галаз алакъалу яз, абуру Ирандиз гайи зарар тамамвилелди эвез хъувун герек я», – лагьана дипломатди.
Орбан магълуб хьана
США-дин вице-президент Жей Ди Вэнса вич Венгрияда кьиле фейи сечкийрин нетижайри пашманарна лагьанва. Идакай «Politico» чешмеди хабар гузва.
«Чун аниз Орбана регьятдаказ гъалибвал къачудайди я лагьана фейиди тушир. Чун аниз гзаф йисара чахъ галаз хьайи инсандин тереф хуьн патал фейиди тир», – лагьана Вэнса. Ада хиве кьурвал, фейи дестедиз Венгриядин регьбер сечкийра кумукьун мумкин тирди чизвай. Вэнса алава хъувурвал, Орбан Брюсселда бюрократиядиз аксивал къалуриз гьазур Европадин сиясатчийрикай сад тир.
Къейд ийин, Венгриядин парламентда гъалибвал Петер Мадьяр кьиле авай «Тиса» партияди къачуна. Венгриядин премьер-министр, «Фидес» партиядин регьбер Виктор Орбана сечкийра вичин магълубвал хиве кьунва.
Фикир дегишарнава
Германиядин канцлер Ф. Мерц Украинадиз Taurus ракетаяр ракъурунин жигьетдай виликан канцлер О. Шольцан хьтин фикирдал ала. «Лента.ру» чешмеди хабар гузвайвал, идакай немсерин сиясатдин са партиядин векилди ихтилатна.
Мерца Германиядин Taurus ракетаяр Украинадиз агакьарунин месэла фадлай гьялна кIанзавайбурукай яз гьисабзава. Амма идалай вилик канцлерди Киевдихъ яргъал мензилдиз фидай чпин хсуси ракетаяр авайдакай, гьавиляй ВСУ-диз Германиядин патай Taurus ракетаяр герекзавачирдакай хабар ганай. Кьилди къачуртIа, ада Украина яракьралди лап хъсандиз таъмин тирди, цIийи яракьрин игьтияж авачирди тестикьарнай.
Яракьар маса гуниз акси я
Америкадин къайдаяр хуьдай органрин къуллугъчийри Израилдиз яракьар ракъурунилай наразивал къалурай ксар кьунва. «РИА Новости» чешмеди раижзавайвал, идакай «New York Times» газетда кхьенва.
«Нью-Йоркда демократиядин партиядин кьве сенатордин офисдин ракIарин патав Израилдиз яракьар маса гуниз аксивал къалурзавай серенжем кьиле фена. Гуьгъуьнлай иштиракчийрикай тахминан 90 кас полициядин къуллугъчийри кьуна», – кхьенва чешмеда.
«Лезги газет»
