Дагъустанда къати марфар къунин нетижада еке зиянар хьанвай агьалийриз гзафбуру куьмекар гузва. Абурун арада чи ватанэгьли, «Единая Россия» партиядин член, машгьур меценат Мамед Абасовни ава.
6-апрелдиз ам Хасавюрт райондиз фена, чкадин агьалийрихъ галаз гуьруьшар кьиле тухвана, арадал атанвай гьаларихъ галаз мукьувай таниш хьана. Мамед Абасова, вичин патай куьмек яз, электрогенераторар, хъвадай шейэр, кIвачин къапар, эцигунра герек къведай алатар ва маса затIар маса къачуна. Къейд ийин хьи, абур вири Бамматюрт хуьруьз агакьарна, гьикI лагьайтIа, ина куьмек кьабулзавай ва ам игьтияж авайбуруз чара ийизвай махсус центр кардик кутунва.
Хасавюрт районда Мамед Абасов кIвалериз зиянар хьанвай инсанар вахтуналди яшамиш жедай пункт кардик кутунвай Сивух, саки тамамдиз цик акатнавай Адильотар хуьрериз мугьман хьана.
«Инсанриз куьмек гун патал чна чалай алакьзавай вири крар ийида. Чарадан дерт авайди туш. Ихьтин гьалара чун, дагъустанвияр, вири сад хьанва, куьмекдихъ муьгьтежбур текдиз тадач…», – лагьана меценатди.
7-апрелдиз Мамед Абасов Дербент райондиз, Мамедкъала поселокдиз, Дагъустандин Огни шегьердиз фена. Инани чи жумарт ватанэгьлиди зиянар хьанвайбуруз куьмекар гудайвал я.
Агьмед Магьмудов
