РД-дин зегьметдин ва яшайишдин рекьяй вилик финин министерстводи ЧС (чрез­вычайная ситуация) арадал атуникди зиянар хьайибуруз са сеферда гузвай пулунин такьатрин гьакъиндай баянар ­гана. Идакай тIвар кьунвай ведомстводин сайтда хабар ганва.

15 675 манатдин кьадарда аваз са сеферда гузвай пулдин жигьетдай агьалийрилай министерстводин «ифей линиядиз» гзаф арзаяр атунихъ галаз алакъалу яз, и ведомстводи гъавурда твазва.

Низ талукь я такьатар?

Куьмек ЧС-дин нетижада зиян хьайибур яз гьисабнавай агьалийриз гузва.

И пул гун патал агьалияр яша­йиш­дин рекьяй хуьдай управлениди (УСЗН) вичи муниципальный образованидин администрацияда махсус къарар (заключение) тIалабзава. Ана агъадихъ галай делилар тайинарун ва тестикьарун герек я:

выплата тIалабзавай агьали ЧС-дин зонада авай яшайишдин дараматда яшамиш жезвайди къалурун (факт);

арза вуганвайдан ва адан хизандин членрин уьмуьрдин шартIар чIур хьун.

ЧС-дин нетижада арза вуганвайдан чарасуз герек къведай эменни амукь тавун.

Такьатар гьикI къачуда?

УСЗН-ди муниципальный админист­ра­циядай вичикай ихтилат физвай заключение къачурдалай кьулухъ са сеферда гудай пулдин выплата тайинардай къарар кьабулда.

РД-дин зегьметдин ва яшайишдин рекьяй вилик финин министерстводи агьалийриз анжах официальный информациядихъ ихтибар авун ва и месэладин гьакъин­дай баян къачун патал ведомст­водин «ифей нумрадиз» (88722 64-15-04) зенг авуниз эвер гузва.

РикIел хкин, алатай нумрада чна «Мусибатдин есирда» кьил ганвай макъалада раиж авурвал, къати марфар къуникди зиянар хьанвай агьалийриз пулдин куьмекар гуда. Абур РД-дин Гьукуматдин ЧС-рин вилик пад кьунин рекьяй резервдин фондунай чара ийида. Кьилинди арзаяр агакьардай вахт ахъай тавун я!

Пулдин такьатралди куьмек ЧС-дин вахтунда зарар ганвай РФ-дин, къецепа­тан­ уьлквейрин ва гражданвал авачир агьа­лийриз ва я абурун законлу векилриз гуда.

Са сеферда­ гудай материальный куьмек – гьар са касдиз 15 675 агъзур манат. Сифтени-сифте лазим эменнидикай­ магьрум хьунай гуда (арза ЧС кардик кутурдалай кьулухъ са вацран вахтунда агакьарун лазим я):

– эгер ам тамамдаказ терг хьан­вачтIа, – 78 735 манат гьар са касдиз;

– эгер эменни тамамдаказ терг хьан­­ватIа, – 156 750 манат гьар са касдиз (арза – ЧС-дилай кьулухъ 6 вацран вахтунда).

Сагъламвилиз зарар хьайила (арза са йисан вахтунда агакьариз жеда):

– юкьван дережадин ва я лап еке хасаратвилер хьанватIа, – 627 000 манат;

– кьезил зарар ганвайла, – 313 500 манат.

Инсан телеф хьайила, кьейи касдин­ хизандиз 1 567 500 манат гузва. И пул хизандин сагьибрин арада сад хьтин кьадарда пайзава. Арзаяр МФЦ-дин ва я яша­йиш­дин рекьяй хуьдай министерст­водин управленидиз ва Госкъуллугърин­ сайтда рекье тваз жеда.

ГьакIни республикадин ЧС малумарнавай муниципалитетрай тир агьалийри­вай квахьнавай документар (СНИЛС ва ИНН, ЕГРН-дай делилар, ОМС-дин полис­, электронный зегьметдин книжкадай выпис­ка, Госкъуллугърин сайт ахъайдай рехъ), гос­пошлина тагана, арадал хкиз жеда.

Гьазурайди — Муса Агьмедов