7-апрелдиз Владимир Путина Дагъустанда арадал атанвай гьалариз талукьарна кьиле тухвай совещанидал РФ-дин тIебиатдин ресурсрин ва экологиядин министр Александр Козлова хабар гайивал, Дагъустанда мад са шумуд юкъуз тIебиатдин шартIар мишекъатбур яз амукьда. Адан гафаралди, тахминан 11-апрелдиз республикадин дагълух районра къати марфар къунин, Самур ва Джурмут вацIара цин дережа хкаж хьунин, ятар акьалтунин игьтималвал ава.
Россиядин Гидрометцентрадин кьилин къуллугъчи Марина Макаровади уьлкведин СМИ-риз ганвай малуматда къейднавайвал, 9-апрелдилай Дагъустандин дагълух районра къати гарар акъатун, къати марфар, живер къун мумкин я. Гьавадин шартIар иллаки республикадин кьиблепата чIур жеда.
Гьелбетда, вири крар Аллагьдин кьадардалди жезва. Амма пешекарри гьавадин шартIариз талукь яз виликамаз ганвай малуматар фикир тагана тамир. И йикъара мукъаятвал квадарна виже къведач. Артух игьтияж авачиз улакьра аваз рекьиз экъечI тавун хъсан я.
«Лезги газет»
