Заз багьа ва истеклу я Самур дередавай чи хуьрер , абур вири зи рик1из сейли я , гьар са хуьруьхъ вичин кьет1ен хат1 ва тарих ава , чпин адетар ава хуьруьз , к1вализ талукь тир. Гьар са хуьр зи вилериз Каинатдин багьа са къаш хьиз аквазва. Иллаки рагъ авай юкъуз яргъай рап1рап1из нурламиш хьана аквада дагъдин кьилел алай къадим тир Чеперин хуьр. А дередай винелди фидайла , гъвеч1и ч1авалай ашкара тир манидин авазари зун гьамиша вичелди ч1угвада .»Такабур тир кьакьан дагьлар Чеперин» магьшур ашукь Абдулан мани я , ам гьамиша визитка хьиз я Чеперин.
Зун гьамиша магьтел ва гьа са вахтунда гьейран жедай кар ам я хьи и хуьруьн итимар Ахцегьрин районда малкъарадин ибарадай лап пара зегьметкеш , т1ебиатдин няс бередани дагълара жедай дурум гана ч1ехи пай уьмуьр тухузвайбур тир…Чабанвал — уьмуьрда сад лагьай пеше я чи дагъларин. Чепер хуьр виринра раиж хьайиди я чпин гьакъисагъ зегьмет ч1угуналди, т1вар ван гьатай хпербан, зегьметдин игит, ССС Р- дин депутат хьайи Межмедин Ризаеван вахтарилай. Адахъ галаз хуьруьн колхоздин амай чубанарни чпин зегьметда вилик жергейра авайбур тир. Абурукай сад тир СССР- Халкьдин депутарин Председателди 1975 йисуз Орден Почета гайи чубан Казумов Мирзе Шалбузовичан хва Шалбузукай эхтилат фида .
Казумов Шалбузан хзанда ирид аял хьана. Дагълу рушар фад гъуьлуьз фена , динж я . Вад гададиз Шалбузаз ,Лукьманаз , Шамилаз, Раифаз , Заураз бубади рухсат гана ч1ехи к1елунар давамариз. Адалай гъейрини, абур вири динжарна, гьар садаз бине кутаз куьмекарна, яни шегьре рекьел акъудна.
Шалбуз Мирзеевич Казумов т1ебиатдин гуьзел береда 31 майдин 1957 йисуз хуьре дидедиз хьана. Школа късан къиметралди акьалт1арна жегьил Махачкъаладавай ДГТУ -дик экеч1на, хкягъай пешени электртехникадин рекьяй тир. 1980 йисан зулухъай Казумов Шалбуз Мирзеевич пешекар диплом гваз Кизляр шегьрдин лап ч1ехи завод тир КЕМЗ — диз акъатна . Гьелбетда, жегьил пешекардиз вични зигьин авай касди фад вичин буржийрив эгеч1на заводдин ч1ехи коллективдва к1валазхиз хьана са хейлин йисара. И йисара ам Кизлярдин эгьли хьанвай , ярар дустар пайда хьана , лезгийриз чеб чпиз хъсан таниш тир. И береда Казумов Шалбуз эвленмишни хьана хзан хьана , к1вал югъ кутуна . Адахъ пуд рушни са хва ва муьжуьд эркек хтулар ава. Аялар вири динж я.
Гьукумат ч1кайла вири хьиз Шалбуз Казумовани алвердин к1валахал машгъул хьана , вичин хсуси кархана ахъайна . «АРЗУ» т1вар алишверишдин фирма са азим вахтуна кардик хьана. Эхиримжи вахтунда Шалбуз Казумов экверин карханадин диспетчерин службадин начальник я. ( филиал ПАО Россети Севрный Кавказ » Дагэнерго). Аадаз и рекьяй Москвада авай кьилин офисдин начальникдалай адан зегьметдиз килигна еке тир къимет гана Гьуьрметдин грамотаярни ганва. » За заслуги в развитии электроэнеогетики РФ», » За обеспечение устойчивого и непрерывного электроснабжения объектов и населения.»
Азад вахтунда Шалбуз буба вичин хтулрин юкьва жеда, абуру адан рик1 аладарзава, ара- бир ам ярар дустарихъ галаз патав гвай Кисловодск шегьердиз акъатда ялар ягъиз. Гьиниз фейит1ани Шалбуз Мирзеевичан виридалайни рик1 гвай чка адан Чепер хуьр я . Анизни ам хъфизва, са кьил ч1угвазва вахарал ,стхайрал , мукьва кьилийрал Дербент, Махачкъалада яшамиш жезвайбурал. Бубадин к1вал Мирзе Казумаван — тарихдин к1вал я, адан шикиларни аманат я тунвай вири аялриз . Белки ама жеди ядигарар яз чубандин к1урт, бармак, чумахъ…
Гьик1 адан бубади аяларив к1елиз туна , абур гьик1 динжарнат1а, бубавилин тарсарни гуз, гьак1 Шалбуз Мирзеевичани бубадин рехъ давамарна.
46 йисан къене са ерида са шегьерда яшамиш жезвай Казумов Шалбуз Мирзеевич шегьерда еке гьуьрмет авай кас я инсанрин обществада. Къизляр шегьердин сагьибди адаз гьамиша чухсагъул лагьанвайди я. Шалбуз Казумова СВО- диз вичин патай куьмекар ганавайдакай заз админстрциядин сайтдай акунай. Адан стхадин хва Элмади Казумов 2024 йикъалай СВО — да женгина ава. Са куьруь
вахтунда ам » За боевые отличия «, » За боевые заслуги» ва гьак1 » За отвагу» РФ — дин президентди кьул ч1угна ганвай медаларин , орденрин сагьиб я. Гьелбетда ,Шалбуз Казумовани вирибуру хьиз гуьзетзава СВО фад куьтягь хьунал. Вич Шалбуз Казумов дагъвидин агъур къилихдин, дуьзвал , гьакъвал к1андай инсан я. Ада халис дуствилиз еке къимет гузва.
Эхтилатра Шалбуз Казумова къейд авурвал , пакагьан энергетикадин гьалар къедамаз вилк физва, яни гарун станцияр эцигзава, ракъинин батареяр пайда жезва, са гафуналди экв — вири я…
Инсанрин к1валериз эквер пайзавай инсан вич рик1е михьи хиялрин эквер авай кас тир Шалбуз Мирзеевич Казумов Чеперин хуьруьн бажарагълу рухвайрикай сад я.
Къуй вичихъ чандихъ сагъвал , рик1ин шадвал хьурай , вичин балайрикай вичиз еке Эквер акурай , чи дидейри лугьудайвал…
Бикеханум Алибегова, писатель
