«Дагъларин гьунарлувал» программадин пешекарар гьазурдай майдандал мулкар вилик тухунин месэладиз талукьарнавай тарсар кьиле фена. СВО-дин ветеранриз лекция Дагъустандин госуниверситетдин дуьньядин ва регионрин экономикадин кафедрадин заведующий, экономикадин илимрин доктор, профессор Мадина Мегьамедовади кIелна.
Лекциядив эгечIдалди, ада «Дагъларин гьунарлувал» программадин иштиракчийриз вичи, маса регионри теклифна, анра СВО-дин ветеранриз экономикадин месэлайрай лекцияр кIелайдакай ихтилатна. Ада хиве кьурвал, вич фейи регионра Дагъустандин программадикай хабар ава ва ам хъсанди яз гьисабзава.
Мадина Мегьамедовади дагъустанвийрив Мурманскдин областдин, Дондал алай Ростов шегьердин «Игитрин девир» программадик квай СВО-дин ветеранрин патай саламарни агакьарна.
Лекциядин чIехи пай мулкар маркетинг ва брендинг авунин месэладиз талукьарнавай. Профессорди регион вилик тухунин карда мулкар маркетинг авунихъ авай метлебдикай тамамвилелди ва галай-галайвал чирвилер гана. Гьа гьисабдай яз, чилер маса гунин, къачунин сирер ачухарна, маса къачудай ихтияр низ аватIа, гъавурда туна.
Программадин иштиракчийри мулкар маркетинг авунин кар алай везифаяр чирна. Илимрин докторди и рекьяй агалкьун къазанмишуниз талукь дибдин терефрикайни лагьана. Абурук чкадин кьетIенвал, инфраструктурадин мумкинвилер акатзава.
Абад Азадов
