Дагъустанди гьасилзава

РД-дин сад лагьай вице-премьер Ман­вел Мажонцан гафаралди, электро­энергия гьасилунин жигьетдай авай кьитвал республикадин системный месэлайрикай сад я. Идакай «Дагъустан» РГВК-дин телеграм-каналди хабар гузва.

Дагъустанди ишлемишзавай электро­энергиядин умуми кьадардикай анжах 54 процент гьасилнава. ИкI, 2025-йисуз 5,4 миллиард кВт/ч гьасилнава, ишлемишнавай кьадар лагьайтIа, 9,6 миллиард кВт/ч агакьна.

Хабар гузвайвал, вад йисан къене­ электроэнергия ишлемишунин кьадар 38 процентдин гзаф хьанва. Вичикай их­тилат­ физвай месэла гьялун патал ругуд­ ин­вестпроект уьмуьрдиз кечирмишзава­. Абурукай пуд проект алай йисуз кардик кутада. И пуд объектдиз чара авунвай хсуси инвес­тицийрин кьадар 80 миллиард манат­дикай ибарат хьанва. Къейдзавайвал, им республикадин тарихда рекорддин кьадар я.

Тахминан рекъем

Дагъустанда цицIерин жуьрейрик акат­завай зиянкарар чукIунин кар гуьзчивилик хуьзва. 2025-йисан зулун нетижайралди, 180 агъзур гектардилай гзаф мулкара махсус ахтармишунар кьиле тухванва, хабар гузва «Дагъустан» РИА-ди.

Къейд ийин хьи, цицIер чукIунин кар, адет яз, гзафни-гзаф республикадин кеферпатан зонадиз хас я.

Россельхозцентрадин Дагъустанда­ авай филиалдин регьбердин гафаралди, ви­ликамаз кьунвай делилралди, 2026-йисуз гьялдай майданрин кьадар 35 агъзур гектардикай ибарат жеда. Алай вахтунда­ пешекарри зиянкаррин «гетIейри» (ку­быш­­ки) кьунвай майданар чирун патал гат­фа­рин гуьзчивалдай ахтармишунар кьиле ту­хузва. Идахъ галаз сад хьиз, талукь тир муд­датар ва гьялдай жуьреярни тайинардайвал.

КIвалах сад-садахъ галаз алакъада аваз тухун патал РД-дин хуьруьн майишатдин ва недай суьрсетдин министерст­во кьиле авай штаб арадал гъанва. Рес­публикадин Гьукуматди гьар йисуз химикатрин куьмекдалди хуьдай (химзащитный) серенжемар кьиле тухун патал такьатар чара ийизва. А мярекатрин арада гьам чилел, гьамни авиациядин куьмекдалди мулкар гьялдай серенжемарни ава.

Вири и кIвалахрин макьсад хаталу зиянкарар чукIунин вилик пад кьун ва хуьруьн майишатдин цанвай тумариз зиян хьуниз рехъ тагун я.

Шейэр вахканва

РикIелай алатай затIар жагъурдай сервисдин куьмекдалди 2026-йисан ян­варь-март варцара СКЖД-дин вокзалрин­ комплексра пассажиррив абуру яргъал рекьериз физвай поездра тунвай 682 жуьреба-жуьре шейэр вахканва. Идакай СКЖД-дин телеграм-каналди хабар гузва.

Чешмеди къейдзавайвал, агьалийри виридалайни гзаф чпин шейэр авай чантаяр ва пакетар, мобильный телефонар ва абурухъ галаз алакъалу шейэр,  кьилел алукIдай затIар, айнаяр, тажар, кIвачин къапар ри­кIелай алудзава.

Эгер куь шейэр, рикIелай алатна, поездда амукьнаватIа, вуч авун герек я?

«РЖД»-дин официальный сайтда авай «РикIелай алатнавай шейэр жагъурун («Поиск забытых вещей») разделда онлайн-арза ацIурна кIанда.

Арзада тIвар, билетдин нумра, телефон, электронный почта ва билет маса­ къачудайла ишлемишай документдин эхи­римжи 4 рекъем (цифра) къалурна кIанда.

Квадарнавай затIар гьихьтинбур ятIа га­лай-галайвал къейдна кIанда ва, абур ва­гонда тахминан гьи чкадал, рикIелай алатна, аламукьун мумкин ятIа къалурна кIанда.

Арза гайидалай кьулухъ пассажирдиз шикилрай чпин шейэр чир хъувун ва я компаниядин къуллугъчийри месэла гьялун вилив хуьн теклифда.

Квахьнавай шейэр жагъуру­нин серенжем рекьяй хтайдалай кьулухъ­ 30 йи­къан­ къене кьиле фин мумкин я, арзадиз ла­гьайтIа, кIвалахдин пуд йикъан къене килигда.

Саки 40 агъзур манат

Дагъустанвийрин гьар вацран муьштеривилин харжияр 40 агъзур манатдиз мукьва хьанва. Идакай, Кеферпатан Кавказдин статистикадин управленидал асаслу яз, «Дагъус­тан­дин экономика» телеграм-каналди хабар гузва.

Чешмеди раижзавайвал, адетдин игьтияжрик акатзава: недай суьрсетар, ала­къадин къуллугъар, интернет, автомобилда бензин, ягъламишдай затIар цун ва мсб.

Вири и крариз Дагъустандин агьалийрин юкьван гьисабдалди, ахтармишунрал асаслу яз кьуртIа, 39,8 агъзур манат пул физва. 2024-йисав гекъигайтIа, и рекъем 10,8 процентдин виниз хкаж хьанва.

Гьазурайди – Муса  Агьмедов