Редакциядиз чар
Ассаламалейкум, играми газет кIелзавайбур!
И йикъара заз жуван са шумуд чирхчирдин мессенджерра авай статусрал Дагъустанда къати марфар къунин нетижада арадал атай татугай гьаларай республикадин Кьил Сергей Меликовак тахсир кутазвай видеояр акуна. И кардин гьакъиндай заз чи жемятдал жуван фикирар агакьариз кIанзава.
Къати марфар къун, селлер атун яраб Сергей Меликован тахсир я жал? ТIебиатдин ихьтин мусибатар дуьньядин вири пипIера арадал къвезва. Гзаф дуьшуьшра кьилдин ксарин эменнидиз зиян хьун анихъ амукьрай, инсанар телеф жезва. Бес ихьтин бедбахтвилер арадал атунин тахсиркарар чкадин гьукумдин кьилевайбур жезвани?
Гьеле Сергей Меликов Дагъустандин гьукумдин кьиле акъваздалди, адалай вилик хьайи регьберри чпиз кIандайвал мулкар, чилер маса гана, чпин нефсер ацIурна. Я тротуарар, я къвайи марфарин ятар авахьна фидай чкаяр, махсус къаналар патал чилин са кIусни тунач. КIвалер акьван акIана-акIана эцигнава хьи, къе Дагъустандин бязи шегьеррикай Бангладешдин ухшар къвезва. Ихьтин гьалара къвайи марфарин ятар бес гьиниз фида?!
Къанунсуздаказ чпиз кIандайбуруз чилер маса гайи регьберри вучиз фикирнач и кардикай? Къе Сергей Меликовак тахсир кутазвайбуру чпин наразивилер гьа чIавуз вучиз къалурнач?
Фикир гайила, республикадин кьилиз ам атайдалай кьулухъ Дагъустанда гьалар хъсан патахъ хейлин дегиш хьана. Виликанбуру хьиз, ада миллетар хайибурузни чарабуруз пайзавач, я яшайишдин хилер вилик тухуниз чара ийизвай пулдин такьатар тарашзавач. Ам халис ватанперес я. Военный рекьяй вич хъсан къуллугъдал алайтIани, ада вичин хва, жергедин хейлин агьалийрин рухваяр хьиз, армиядиз рекье туна. Ватандин вилик вичин хивевай везифаяр кьилиз акъуддайла, ам 2000-йисара телеф хьана. Гьадавайни, хейлин маса гьакимривай хьиз, вичин хва, армиядиз рекье тун тавуна, пата-къерехдиз акъудиз жедай кьван!
Килиг садра, чи патара эхиримжи йисара гьикьван мектебар, аялрин бахчаяр эцигнаватIа, цIийи рекьер, спортдин майданар туькIуьрнаватIа. Яраб и крар къе адак тахсир кутазвайбуруз аквазвач жал?
Дагъустандин шегьерра яшамиш жезвай бязи агьалийри чеб халис цIуьрнуьгъри хьиз тухузва, какатай чкадал зирзибил гадариз, хъуртар арадал гъизва. Улакьар гьалзавай тегьердикай мад рахан тийин. Рекьера гьерекат авунин къайдайрал амалзавайбур тIимил я. Улакьарни шегьеррин куьчейра какатай чкайрал туна, сятералди чпин дердийриз физва, масабур патал къулайсузвилер арадал гъизва.
Вилик фенвай вири уьлквейра, шегьерра чкадин агьалияр меденивал чидай, чеб яшамиш жезвай чкадихъ рикI кузвай ксар я. Жув яшамиш жезвай чка сифте нубатда жува михьидаказ хвена кIанда. Килиг садра къе Кьурагь райондин КьепIиррин, Ахцегь райондин ЦIийи Гъуьгъвезрин хуьрериз. Вири халкьди, сад хьана, чпин хайи ерияр вилик тухузва, абадзава.
Дагъустандин халкьарин девлетар тарашна, хайи республикадиз са хийирни тагай виликан «регьберрин» гъалатIар аквазвач. Авай гаф чинал лугьудай, итимвал квай халис ватанперес Сергей Алимовичак тахсирар кутазва. Ни? Сифте нубатда адан гьахълувал такIанбуру! Жуьреба-жуьре кьуьруькар ийиз, республикада гьалар пайгардикай хкудиз алахънавайбуру. А кар абурулай алакьдач!
Играми стхаярни вахар! Ша чна интернетдин майданра чи халкьдин кьегьал хва Сергей Алимовичак тахсирар кутан тийин, адан пад хуьн, адаз куьмекин. Текъвезвай тарифар ийин лугьузвач за. Михьидаз — михьиди, кьацIайдаз кьацIайди лагьана кIанда.
За садрани гьукуматдин къуллугъдал кIвалахайди туш, гьукуматдин идарайрай я са хийирни къачунач. Зи ихтилатар михьи рикIелди ийизвайбур я. Эхиримжи йисара дуьньяда гунагьдин, чIуру крар гзаф жезва. Ша чна Аллагьдиз такIан крарик кьил кутан тийин, адан регьимдик акатдай крар ийиз алахъин!
Руслан Мегьдиханов,
«Леки» фондунин векил
