Багьа ракетаяр серфна

Хейлин СМИ-ри хабар гузвайвал, США-ди Ирандиз ягъунар кьунин гьерекатра са йисан запасдин ракетаяр серфнава.

«Bloomberg» агентстводи чапнавай малуматдал асаслу яз, США-ди гьар сад 1,5 миллион доллардин къиметдик квай JASSM ракетаяр агъзурдалай гзаф ишлемишнава. Къейдзавай­вал, яракьрин «Lockheed Martin» тешкилатдивай ихьтин ракетаяр йисан муддатда анжах 860 акъудиз жезва.

Идалай вилик бязи чешмейри къейд авурвал, Вашингтонди дяведин серенжем кьиле тухун патал триллион доллар кьван такьатар харжнава.

Ирандин мулкара авай объектрал гьужум авунин серенжем США-ди  28-февралдиз башламишнай. А чIавуз хейлин дарама­тар барбатIна, ислягь агьалияр телеф хьана. РикIел хкин хьи, сифте юкъуз авиациядин ягъунрик Ирандин кьиблепата авай рушарин мектеб акатнай. Жаваб яз, Иранди Израилдин мулкарал, гьакIни Мукьвал тир Востокда авай Америкадин военный базайрал гьужумзавай.

30-мартдиз США-дини Израилди гуманитарный куьмек агакьарзавай Ирандин самолетдал гьужумна. Идакай «РИА Новос­ти» чешмеди хабар гана.

«Америкадини Израилди Ирандин Мешхед шегьердин аэропортуна ацукьай самолетдал гьужум авун чна еке батIулвал яз гьисабзава, и самолетда са шумуд уьлкведи куьмек яз ганвай дарманар ва медицинадин тадаракар авай», – раижзава «SNN» телеканалди.

Ирандин гьукумдарри вири халкьариз талукь дуьньядин тешкилатривай и агьвалат ахтармишун истемишзава.

31-мартдиз Дональд Трампа Ирандиз акси яз кьиле тухузвай серенжем акьалтIариз гьазур тирди лагьана. «Гьатта Ормуздин пролив са кьадарда кIевирнаваз амукьайтIани, США-ди Ирандиз акси яз кьиле тухузвай дяведин серенжемдал нукьтIа эцигиз Трамп гьазур я, идакай ада вичин куьмекчийриз ихтилатна», – кхьизва Америкадин газетди.

Нагьакьан регьбердикай

Тегерандиз Украинадин халкьдихъ галаз алакъалу яз арадал атанвай четин месэлаяр авач. Арадал атанвай четин месэла Владимир Зеленскийдихъ галаз алакъалуди я. «ТАСС» чешмеди хабар гузвайвал, ихьтин фикир Узбекистанда авай Ирандин посол Могьаммад Али Искандариди лагьанва.

«Украинадихъ галаз са месэлани авайди туш… Четин месэ­ла а государстводин кьилихъ галаз алакъалу я. Аквазвани, са нагьакьан регьберди гьихьтин йикъал гъизватIа?» ­– лагьана посолди.

Махсус серенжемдикай

31-мартдиз РФ-дин оборонадин министерстводи хабар гайи­вал, Россиядин кьушунрин «Кефер пад» дестеди женгер тухузвай мулкара суткадин муддатда ВСУ-дин 265 военный, мягькемарнавай 3 махсус машин, адетдин 10 автомобиль терг хьана.

Гьа и йифиз ВСУ-ди чи уьлкведин регионрал ахъаяй 92 беспилотник ПВО-дин такьатри тергна. Кьилди къачуртIа, ВСУ-ди нафтIадин кIвалахрихъ галаз алакъалу Балтикадин чIехи портунал, Ленинграддин областдин Усть-Лугадал гьужумна. Ленинграддин областдал ахъаяй 38 беспилотник яна. Усть-Луга портуниз, Кирован райондин Молодцово поселокдин пуд кIвализ, мектебдин ва агьалияр яшайишдин рекьяй хуьдай идарадин дараматриз дронрин кIусари зиянар гана.

ВСУ-ди яшайишдиз талукь дараматрал ийизвай гьужумриз­ жаваб яз, Россиядин кьушунри мидяяр, абурун техника ва гьа­къидихъ кьунвай аскерар алай чкайриз, гьакIни энергетикадин, оборонадин промышленностдин объектриз ягъунар кьазва.

Маса рекьер авач

Евросоюздиз Украина такьатралди таъминардай маса чараяр, мумкинвилер авач. Идакай «Европадин гьакъикъат» чешмеда хабар ганва. «В. Зеленскийди гьар сеферда ЕС-дин патай пулунин такьатар гудай маса рекьер вилив хуьзвайдакай лугьузва. ЕС-дихъ лагьайтIа, такьатар гунин маса мумкинвилер авайди туш», – кхьизва чешмеди.

Къейд ийин, мартдин юкьвара хьиз Венгриядини Словакияди Украинадиз 90 миллиард евродин кредит чара авунин гьерекат акъвазарна. Евросоюздин саммит кьиле фейидалай кьулухъ Евросоветдин председатель А. Коштади, Венгриядин премьер-министр В. Орбана вич тухузвай тегьер бегенмиш туш лугьуз, адаз акси рахунар авунай.

«Лезги газет»