КIелунин 2025-2026-йисан вахтунда Дагъустандин мектебрин бинедал тарсарилай гуьгъуьниз гьазурвал акун давамардай (продленный) 650-далай гзаф дестеяр (ГПД) кардик ква, хабар гузва РД-дин образованидин ва илимдин министерстводи.
658-дакай 499 десте гъвечIи классрин аялар патал я. Тарсар куьтягь хьайидалай кьулухъ мектебра 1-4-классра кIелзавай 10 агъзурдалай гзаф (республикадин мулкунал сифтегьан классра кIелзавай вири аялрин 5 процентдиз барабар) ученикар амукьзава.
«Хизан» милли проектдин «1-4-классра кIелзавайбурун арада давамарнавай йикъан дестейра авайбурун сан» делил республика патал 2025-йисан планда къалурнавай кьадардив агакьарнава», – къейдзава министерстводи. Идаради гъавурда твазвайвал, мектебра тарсарилай кьулухъ давамарнавай йикъан дестеяр абурухъ игьтияж аваз хьайитIа тешкилзава. Амма образованидин идарадихъ и кар патал лазим алатринни техникадин мумкинвилер хьун лазим я.
«Образованидин министерстводи гьам алатай йисуз, гьамни цIи ихьтин дестеяр гьар са мектебда тешкилуниз эвер гузва, – эсиллагь мумкин кар тушир дуьшуьшар квачиз. Месела, тIимил аялар авай мектебра ихьтин игьтияж авач. Идалайни гъейри, мектебдихъ лазим тир къурулушар авачтIа, ихьтин дестеяр тешкил тавуртIани жеда. Амай вири дуьшуьшра министерстводи продленкаяр арадал гъунин патахъай тагькимарзава», – лугьузва умуми образование вилик тухунин управленидин начальник Аймисей Акаевади.
Давамарнавай йикъан дестейра аялар асул гьисабдай чпин чирвилер ва вердишвилер артухарунал машгъул я, амма абурувай муаллимдин куьмекдикни умуд кутуртIа жеда.
«Аялри ял ягъун патал физкультдекьикьаярни, къугъунарни, шикилар ягъунарни жезва. Ихьтин дестейра мектебра кIелзавай вири аялривай иштиракиз жеда», – къейдзава А. Акаевади. Малум тирвал, хуьруьн чкайра ихьтин дестеяр пулсуздаказ ачухзава, шегьеррин округра – гьакъидихъ.
Къейд ийин хьи, РФ-дин просвещенидин министр Сергей Кравцова и мукьвара малумарайвал, 2030-йис алукьдайла, мектебрин бинедаллай давамарнавай йикъан дестейра иштиракзавай аялрин кьадар 1-4-классра кIелзавай аялрин умуми кьадардин 17,6 процентдилай тIимил тахьун лазим я. Къенин юкъуз уьлкведин мулкунал ихьтин дестейрик 1,43 миллион аял ква.
«Давамарнавай йикъан дестеяр неинки аял тарсарилай кьулухъ гуьзчивилик хуьдай къайдадиз, гьакIни образование ва тербия гунин тамам алемдиз элкъвезва – ина аялривай кIвалин кIвалахар тамамариз, машгъулардай ва я зигьин, акьуллувал, алакьунар гегьеншардай къугъунра, тапшуругъра иштиракиз жезва. Гьа са вахтунда аялри чпин азад вахт, диде-буба кIвалахдилай хкведалди, хатасуз шартIара акъудзава. Гьаниз килигна, и рекье кIвалахун ва ихьтин дестейрин кьадар чна къвердавай артухарда», – лугьузва министрди.
Амина Муслимова
