Махачкъалада 31-мартдилай 6-апрелдалди балугъар ва абурукай гьазурнавай суьрсет маса гудай хуьруьн майишатдин мекера кьиле фида, хабар гузва РД-дин балугъчивилин майишатдин комитетди. Алишверишдин дезгеяр И. Шамилан тIварунихъ галай куьчеда авай «Устадрин аллеяда» эцигда.
Мекерада агьалийривай таза балугъар ва Дагъустан Республикадинни Белоруссиядин хуьруьн майишатдин карханайрин суьрсет агъуз тир къиметрай маса къачуз жеда.
И мукьвара РД-дин балугъчивилин майишатдин комитетдин кьил Хадижат Шамхаловади РД-дин Гьукуматдин совещанидал къейд авурвал, хуьруьн майишатдин ва балугъчивилин хилерин мекераяр Дагъустандин мулкунал вахт-вахтунда кьиле тухуда. Абур недай суьрсетдин къиметар хкаж хьунин вилик пад кьунин нетижалу алатдиз элкъуьн лазим я.
Балугъар и къайдада маса гунин артуханвал арада алишвериш ийизвай маса ксар гьат тавун яз гьисабзава. Чпин суьрсет муьштерийрин вилик ам гьасилай ксари гъизва. Х. Шамхаловади къейд авурвал, къецепатан уьлквейрай гъизвай суьрсетдин къиметар, санлай къачурла, са кьадар хкаж хьанватIани, чкадин балугърин къиметар ужуз жез башламишнава. Ада гьисабзавайвал, им балугърин ветегайрин сезон башламишунихъ ва базарда балугърин кьадар гзаф хьунихъ галаз алакъалу я.
Чи мухбир
