И йикъара чи арадай, 78 йисан яшда аваз, лезгийрин машгьур гьикаятчи, публицист, яргъал йисара муаллим яз кIвалахай Нажмудин Кьадиевич Шихнабиев акъатна.
Н.Кь.Шихнабиев 1947-йисан июндиз СтIал Сулейманан райондин Шихидхуьре дидедиз хьана. Ада хуьруьн мектеб, ДГУ-дин филологиядин факультет акьалтIарна, вичин вири уьмуьр ва алакьунар акьалтзавай несилриз дидед чIалай ва литературадай дерин чирвилер гуниз ва абурук ахлакьдин виниз тир ерияр кутуниз бахшна. Яргъал йисара Шихидхуьруьн мектебда кIвалахай ам СтIал Сулейманан районда кар алай муаллимрикай сад тир.
Н.Кь. Шихнабиев халкьдин гегьенш къатара сифте нубатда бажарагълу гьикаятчи, шаир яз машгьур хьана. Адан къелемдикай хкатай «Куьредин билбил», «Мехъер», «Уьмуьрдин декьикьаяр», «Куьредин аламатар», «Шаирдин рикI», «Зун рикI я» ва маса ктабар, цIудралди хъсан очеркар, къаравилияр, шиирар, басняяр кIелзавайбуру хушдиз кьабулна.
Писателди «Лезги газетдин» редакциядихъ галаз фадлай сих алакъаяр хуьзвай. Гьар меркездиз мугьман хьайила, Нажмудин муаллимди редакциядин коллективдал кьил чIугвадай, чал хайи ерийрай цIийи хабарар агакьардай. Газетдин чинризни адан эсерар мукьвал-мукьвал акъатзавай. Лезги чIалан, эдебиятдин вилик лайихлувилер фикирда кьуна ва хейлин йисара милли газетдин редакциядихъ галаз алакъаяр хуьнай Нажмудин Шихнабиеваз алатай йисуз «Лезги газет» — 100 йис» медални ганай.
Н.Кь. Шихнабиеван яратмишунрин алемдикай рахадайла, адахъ галаз санал кIелай, яргъал йисара «Лезги газетдин» эдебиятдин отделдин редактор хьайи машгьур шаир Мердали Жалилова кхьизва:
«Н. Шихнабиева шииратдин эсерар фадлай кхьизвай. Студент тир йисара адахъ самбар шиирар урус чIалал кхьенвайбурни авай. Иллаки сатирадинни юмордин тах квайбурун таъсирлувал кьетIенди тир. ЯтIани адан гьикаятди кIвенкI къачуна, майдандиз чIехи ктабарни акъатна.
Гьикаятдин эсер кIелдайдаз мукьва ва хуш ийизвайди сифте нубатда, адан художественный чIалан парча я. А затI «хурунин» жигьетдай Н. Шихнабиев устад тирди адан гьар гьи шей кIелайтIани успат жеда. Н. Шихнабиеваз алазни-алачизни агьвалатар яргъи авун, лугьудайвал, рахунрик «артухан яд кцун» хас туш. Гаф вичин чкадал лагьайла, адахъ къуват ва метлеб жезвайди я.
Зи фикир я, Шихнабиеван яратмишунрин алем гьелелиг ахъай тавунвай сандух хьиз я…».
Эхиримжи йисара Н.Кь.Шихнабиев, лайихлу пенсиядиз экъечIна, вичин яратмишунрал машгъул жезвай. Ада хайи районда, Махачкъалада кьиле физвай, лезги халкьдиз талукьарнавай мярекатра активнидаказ иштиракдай. Кьасумхуьрел медениятдин «Куьредин ярар» центр тешкилунин кьиле хьайи ксарикайни сад гьам я. Лезги чIалан ва литературадин гзаф мярекатрал ам вичин фикир — акьалтIай дуьз къиметар гваз экъечIдай, чIал хуьнин ва вилик тухунин жигьетдай къиметлу теклифарни гудай…
«Лезги газетдин» редакциядин коллективди, Нажмудин Кьадиевич Шихнабиев рагьметдиз финихъ галаз алакъалу яз, адан веледриз, хизанриз, вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат чи рикIера эбеди яз амукьда.
