Ахцегь районда Хуьруьгрин тарихдин мискIин туькIуьр хъувуна акьалтIарнава, — хабар гузва РД-дин Кьилин Администрациядин телеграм-каналди. Медениятдин ирсинин объект яргъал тир XVII виш йисара эцигнай. Хейлин йисара мискIин чкIидай гьалда авай, михьиз кIватун мумкин тир. И кар фикирда кьуна, аниз инсанарни ахъайзамачир. 2022-йисан сентябрдиз Дагъустандин Кьил Сергей Меликов, чкадал фена, мискIин авай гьалдихъ галаз таниш хьана. А чIавуз ада, энгел тавуна туькIуьр хъувунин кIвалахар гъиле кьун тапшурмишнай ва тарихдин гуьмбет хвена кIанзавайди къейднай.
Медениятдин ирсинин объект Росимуществодин гьисабда ава. Са йисан къене ам Дербентдин музейдив-заповедникдив вахкана. И карди туькIуьр хъувунин кIвалахрал махсус компания желб ийидай мумкинвал гана.
Къейд ийин хьи, вири кIвалахар РД-дин медениятдин ирс хуьнин рекьяй кардик квай Агентстводин гуьзчивилик кваз кьиле фена. ЦIийикIа туькIуьр хъийидайла, дараматдин тарихдин къамат ва къенепатан архитектурадин кьетIенвилер авайвал хвена. И кIвалахра гьакIни меценатри, чкадин агьалийри иштиракна. Алай вахтунда мискIин патал са хаталувални авач, ана гьар юкъуз динэгьлийри капI ийизва.
Маса программайрин куьмекдалди мискIиндиз физвай рехъни авадан авуна. ГьакIни тарихдин метлеб авай дараматдин патав дагълар ва Самур вацI хъсандиз аквазвай чкадал килигдай майданни кардик кутунва.
Чи мухбир
