Мусурманар патал пакди тир Сив хуьнин суварин вилик Дагъустандин хуьруьн майишатдин зегьметчийри СВО-дин майданра Ватан хуьзвай ватанэгьлияр патал мергьяматлувилин са жерге серенжемар кьилиз акъудна. Гьа жергедай яз, Мегьарамдхуьруьн райондин хуьруьн майишатдин чIехи карханайрикай сад тир «Багъ» КФХ-ди аскерар патал 20 тонн ичер рекье туна, хабар гузва РД-дин хуьруьн майишатдин ва недай суьрсетдин министерстводи.
СВО кьиле физвай мулкариз рекье тун патал виниз тир еридин емишар хкяна: багъманчийри абурук муьштерийри рикI алаз хкязавай ва яргъал рекье хуьз жедай «гренни Смит», «ред чиф, «гала» ва «Симиренко» сортарин ичер кутуна.
«Жуван зегьметдалди арадал гъанвай емишар уьлкведин хатасузвал хуьн патал къизгъин женгера авай ватанэгьлийриз рекье твадай мумкинвал хьун – им чун патал еке гьуьрмет я. И ичери Дагъустандин ракъинин ва чи къайгъудар гъилерин чим кужумнава. Чаз абурун дад акур гьар са аскерди хайи кIвалин гьава гьиссна кIанзава», – лугьузва «Багъ» КФХ-дин багъманчийри.
Мукьвал йикъара Дагъустандин ичер авай машин кьушунрин частарив агакьдайвал я. Емишар аскеррин арада пайда. Къейд ийин, им Дагъустандин хуьруьн майишатдин зегьметчийрин ихьтин сад лагьай серенжем туш. Идалай вилик республикади СВО-дин мулкариз минеральный ятар, якIун консервияр ва сезондин майваяр рекье тунай. Ихьтин кIвалах инлай кьулухъни давамарда.
Гьа са вахтунда Мегьарамдхуьруьн райондин лежбервилинни фермервилин «Багъ» майишат емишар ва майваяр хуьдай гьамбарханадин цIийи дарамат эцигунивни эгечIнава. Министерстводи хабар гузвайвал, объект Чепелрин хуьруьн патав эцигзава. Ам ишлемишиз вахкайдалай кьулухъ карханадиз санлай 10 агъзур тонн (5 агъзур тонн емишар хуьдай мумкинвал авай сад лагьай дарамат алай вахтунда ишлемишзава) суьрсет хуьдай мумкинвал жеда.
Лагьана кIанда хьи, эхиримжи пуд йисан вахтунда Дагъустанда емишар ва майваяр хуьдай гьамбарханайрин мумкинвилер 2,5 сеферда артух хьанва – 22,2 агъзур тонндилай 57,9 агъзур тонндив агакьдалди. И рекье асул пай чIехи агрофирмайри – «Полоса» ва «Анжелина» ООО-ри ва «Багъ» КФХ-ди кутунва. Чпин мулкара кьилиз акъудзавай инвестпроектрин сергьятра аваз, абуру, санлай къачурла, 70 агъзур тонн емишар ва майваяр хуьдай мумкинвал жедай алай аямдин комплексар арадал гъизва.
Министерстводи къейдзавайвал, гьасилзавай хуьруьн майишатдин суьрсет ерилудаказ хуьдай чкаяр хьун таъминаруни чкадин емишар ва майваяр туьквенрин дезгейрал йисан кьиляй-кьилиз кьван агакьардай ва сезонрин арайра авай вахтунда абурун къиметар садлагьана хкаж хьунин вилик пад кьадай мумкинвал гуда. Алай вахтунда региондихъ 260 агъзур тонн суьрсет хуьз жедай гьамбарханайрин игьтияж ава.
Саида Мурадова
