Дагъустан Республикадин Кьил Сергей Меликова 24-мартдиз, агломерацияр вилик тухуниз талукьарна, коор­динационный советдин заседание кьиле тухвана. Мярекат ачухдайла, ре­гиондин регьберди къейдна хьи, алай аямдин агломерацияр тешкилунин ва комплекснидаказ вилик тухунин месэлайрихъ республика яша­йиш­динни экономикадин рекьяй вилик финин карда кьетIен метлеб ава.

«Чун анжах гзаф квартирайрикай ибарат кIвалер эцигуникай рахазвач. Чаз  эцигунриз ва яшайишдиз талукь  инфраструктурайрин рекьяй чилерин мулкари­кай менфят къачунни важиблу я. Чна рекьерни туькIуьрна, жемиятдин майданарни аваданламишна, цIийи магьлейра школаярни, аялрин бахчаярни, спортдин ва культурадин идараярни эцигна­ кIанзава. Чаз уьлкведин маса регионра шегьерар гьикI гуьрчег ва гегьенш жез­ватIа аквазва. Гьайиф хьи, Дагъус­танда и месэла гъиляй вегьенва. Чна, и карда дегишвал туна, законсуз эцигунрин вилик пад кьадай менфятлу къарар кьабулун лазим я. Чаз пара гуьрчег, авадан, агьалийриз вири жуьредин къулайвилер авай шегьерар герек я», — лагьана Сергей Меликова.

Региондин Кьилин важиблу тапшуру­гъар кьилиз акъудзавай гьалдикай РД-дин эцигунрин, архитектурадин ва ЖКХ-дин министр Бахтияр Уллаева доклад авуна. Мярекатдал мулкар комплекснидаказ вилик тухунин месэлайризни килигна. Иштиракчийри Махачкъалада, Да­­гъустандин Огнида ва Буйнакск районда талукь проектар уьмуьрдиз кечирмишзавай гьални веревирдна.

ИкI, республикадин меркезда яша­йиш­­дин кIвалер эцигдай 11 майдан тайи­нарнава. Эцигунардай карханайрихъ галаз икьрарар кутIуннава. Абуру цIийи май­­данрал яшайишдин объектарни ­эцигда.

Заседанидал Каспийск шегьердин чилер ишлемишуниз талукь генеральный пландизни килигна. Алай вахтунда шегьердин центральный майданда яшайишдин кIвалер эцигуниз талукь карта туькIуьрнава.

Махачкъаладинни Каспийскдин агломерацияда  цIийи поликлиникайрин дараматар эцигуниз талукь месэлани къарагъарна. Региондин Кьили, агьалийриз къулай жедайвал, дараматар эцигдай кутугай чкаяр хкягъун тапшурмишна.

Чилерин мулкар агьалийриз хийир хкатдайвал ишлемишуниз талукь яз Сергей Меликова ихьтин баянар гана: «Чилерин мулкар дагъустанвийриз анжах хийир хкатдайвал ишлемишна кIанда. И кар патални чахъ къе вири мумкинвилер ава. Инвестпроектар уьмуьрдиз кечирмишзавай вири участокар чаз кардик кутаз кIанзава. Нетижада налогар артух къведа ва игьтияж авайбур кIвалералди таъминардай мумкинвални жеда».

Мярекатдин эхирдай региондин Кьили са жерге тапшуругъар гана.

*  *  *

Гьа и юкъуз Сергей Меликова РД-дин оперативный штабдин ва республикадин призывдин комиссиядин саналди­ тир заседанини кьиле тухвана. Адан кIва­лахда гьукумдин органрин кьилери,­ военкомри, муниципалитетрин кьиле­ авайбуру иштиракна. Абур агьалияр сиф­тегьан аскервилин учетдал эцигунин­ ва районринни шегьеррин призывдин комиссийрин кIвалахдин нетижайриз килигна.

Сергей Меликова рикIел хкайвал, 2026-йисуз призывдин комиссийри йисан вири вахтунда кIвалахзава. Гьавиляй талукь къуллугъчийривай закондин сер­гьят­ра аваз чпин везифаяр кьилиз акъудун истемишна.

Муниципалитетрин призывдин ко­мис­­­сийрин кIвалахдикай респуб­ли­ка­дин­ военный комиссар Абдурагьман Му­рад­ханова гегьеншдиз ихтилатна. Да­гъус­тан­­да агьалияр призывдиз талукь­ месэ­лайрикай датIана хабардарзава­, повест­каяр электронный къайдадани­ ага­кьарзава. Муниципалитетрин вири ко­миссийри агьалияр графикдин бине­даллаз аскервилин учетдал эцигзава. Идалай гъейри­, РФ-дин оборонадин ми­нистерст­водин вузрик экечIиз кIанзавай жегьиларни хкязава. И кIвалах ил­ла­ки­ Каспийск шегьердин, Бабаюрт ва Гу­ниб­ рай­онрин военный комиссариатра хъсандиз тешкилнава.

Сергей Меликова регионда авай час­тар призывдин кIвалахдал желб авун важиблу тирди къейдна. ГьикI лагьайтIа, абуру чпин кIвалахдикай, аскерриз авай кьезилвилерикай, офицердин къуллугъдикай, чпин тежрибадикай менфятлу ихтилатар ийида.

Муниципалитетрин кьилериз военный комиссариатрин къуллугъчийрихъ галаз­ санал призывникар хабардар авунин кIва­­­лахдик йигинвал кутунин, и кардал СМИ-ярни желб авунин тапшуругъ гана.

Хийир Эмиров