СтIал Сулейманан райондин ЦIийи хуьряй тир Лазар ва Индира Алиеврин хизанди Москвадин областдин Подольск шегьерда гьуьрмет къазанмишнава. Чи суьгьбет абурун каратэдай чемпион хва Рустамакай я.
Адан 15 йис я, ада 9-классда вири предметрай лап хъсан къиметар аваз кIелзава, школьникрин олимпиадайра кIвенкIвечи чкаяр кьазва. Гьа са вахтунда Рустам кёкусинкай каратэдал машгъул жез 7 йис я. Тежрибалу тренер, чIулав чIулунин сагьиб Даниил Смирнован гъилик вердишвилер къачузвай ва устадвал хкажзавай Рустам алай вахтунда вичин яшарин спортсменрин арада неинки Москвадин областда, санлай уьлкведа машгьур каратистрикай сад я. Мукьвара ада Москвада «Кубок наций» лишандик кваз кёкусинкай каратэдай кьиле фейи международный акъажунра иштиракна. Ана 40-далай виниз уьлквейрай атанвай спортсменри иштиракуни турнирдин виниз тир дережадин гьакъиндай шагьидвалзава.
Акъажунра Рустама 5 бягьс тухвана, вирибурун винел вахтундилай вилик гъалибвал къачуна ва кесерлу турнирда 1-чка кьуна. Адаз кубок, медаль ва грамота гана.
Санлай къачурла, Рустам Алиевахъ Москвадин областдин, Вирироссиядин ва международный турнирра къачунвай 36 медаль, гзаф кьадар кубокар, грамотаяр ава.
Рустаман чIехи бубади чаз лагьайвал, алай вахтунда жаван чемпионди Японияда кьиле фидай кесерлу турнирдиз гьазурвилер аквазва.
«Кубок наций» турнирда къазанмишнавай агалкьун мубарак авуналди, чаз Рустам Алиевахъ кIелунра ва спортда мадни еке агалкьунар хьана кIанзава.
Хазран Кьасумов
