И йикъара Россиядин ФСИН-дин (Федеральная служба исполнения наказаний) Дагъустанда авай Управленида кIвалахдин рекьяй месэлаяр веревирд авун патал УФСИН-дин начальник, къенепатан къуллугъдин генерал-майор Сергей Ролдугин Дагъустандин эцигунрин, архитектурадинни ЖКХ-дин министр Бахтияр Уллаевахъ галаз гуьруьшмиш хьана. Гуьруьшда УФСИН-дин начальникдин заместитель, къенепатан къуллугъдин полковник Абдулхакь Абдулхакьовани иштиракна. Терефри уголовно-исполнительный къурулушдин (УИС — уголовно-исполнительная система) идарайри республикадин ва федеральный проектар кьилиз акъудун патал милли проектра саналди иштиракунин месэлаяр веревирдна.
Гуьруьшдин вахтунда Сергей Ролдугина УИС-дин идарайрин промышленностдин сектордихъ авай мумкинвилерихъ галаз танишарна. Абурухъ яшайишдин игьтияжар патал продукция акъуддай гьазурвал авайдал фикир желбна. Кьилди къачуртIа, цIийиз эцигзавай объектар школадин мебелдалди тамамдаказ таъминарун патал «100 школа» проектда иштиракунин теклиф гана.
— Чахъ Дагъустан Республикадин образованидин ва илимдин министерстводихъ галаз и хиле кIвалахунин тежриба ава. Анжах са 2025-йисуз региондин УИС-дин производстводин секторда республикадин образованидин идарайрин игьтияжар патал, санлай къачурла, 40 миллион манатдилай виниз къимет авай школадин мебель гьазурна ва чкайрал агакьарна, — лагьана С. Ролдугина.
УФСИН-дин начальникди УИС-дин идарайра школаяр патал гьазурзавай мебелдин чешнеярни къалурна, гьакI производстводин сектордин къуватлувал къалурун патал кIвалахдин чкайрихъ галазни танишарна.
Бахтияр Уллаева Сергей Ролдугинан теклифдин тереф хвена. Вичин нубатдай яз, министрди саналди кIвалахунин алава хилерни къейдна. Ада УИС-дин идарайра гьазурзавай продукциядин еридиз виниз тир къимет гана. Гьа са вахтунда Б. Уллаева идарадиз «Формирование комфортной городской среды» федеральный проектда иштиракунни теклифна. Ихтилат республикадин общественный чкаяр аваданламишун патал ракьун тIваларин жугъунар ва архитектурадин гъвечIи кIалубар гьазуруникай физва.
— Куь идарайра акъудзавай продукциядихъ игьтияж ава. Чаз гележегда архитектурадин гъвечIи кIалубар гьазурунин заказар, пайна, квевни вугун хъсан аквазва. Сифте нубатда, республикадин шегьерар ва районар аваданламишун патал эцигун пландик квай ракьун тIваларин жугъунрикай ихтилат физва, — къейдна министрди.
Идалайни гъейри, саналди кIвалахун ва заказар пайна гунин серенжем кьезиларун патал Б. Уллаева министерстводик акатзавай идара – «Гьукуматдин сад тир заказчик-застройщикдин дирекция» ГКУ-дихъ галаз санал кIвалахдай механизм арадал гъун теклифна. И идара лагьайтIа, республикада эцигунардай чIехи пай объектрин заказчик я. Ада гьукуматдин икьрарар кьилиз акъудунал УФСИН-дин производстводин къуватлувал желб авуни сих алакъада аваз санал кIвалахун цIийи дережадиз акъуддай мумкинвал гуда.
— ГКУ-дин куьмекдалди заказар кьилиз акъудуни чаз школаяр ва я шегьерар аваданламишун патал дуьм-дуьздаказ кIвалахдин кьадар, вахт ва лазим продукциядин кIватIал тайинариз куьмекда. Ида чна санал кIвалахун ачухдиз ва карни фад кьиле тухудай мумкинвал гуда, — къейдна министрди.
УФСИН-дин начальникди заказар кьабулунин кIвалах гьам дуьз рекьел хкидай колонийрихъ галаз арада масад авачиз ва гьамни субподряддин куьмекдалди кьилиз акъудун теклифна.
Б. Уллаева УИС-дин производстводин сектордиз вич фена килигдайдакай лагьана, гьакIни УФСИН-дин кьиле авай ксариз пудратчи тешкилатрихъ галаз кIвалахунин месэлайрай совещанидал теклифна.
Гуьруьшдин нетижада тешкиллувилин месэлаяр тадидаказ гьялун патал УФСИН-дин ва «Гьукуматдин сад тир заказчик-застройщикдин дирекция» ГКУ-дин векилрин иштираквал аваз санал кIвалахдай десте арадал гъунин икьрардал атана. Ида УИС-дин производство кIвалахдик кутадай ва акъудзавай метягьрин кьадар артухардай мумкинвал гуда. Идалайни гъейри, республикадин инфраструктура вилик тухуник ва аваданламишуник дустагънавайбуруни чIехи пай кутада, зегьметдихъ галаз абурун вердишвални артух жеда.
Рагнеда Рамалданова
