Дагъустандин хуьруьн майишатдин зегьметчияр гатфарин кIвалахрив эгечIнава. Алай вахтунда республикада тумар цазвай майданри 369 агъзур гектар тешкилзава. Им 2025-йисуз тумар цайи чилерилай 13 агъзур гектардин гзаф я. Гатфарихъ магьсулдарри 225 агъзур гектарда чилик тумар кутада.
И мукьвара кьиле фейи заседанидал Дагъустандин Гьукуматдин Председатель Абдулмуслим Абдулмуслимова хабар гайивал, республикада алатай йисара цайи гзаф йисарин набататар авай майданри 49 агъзур гектар кьазва. Лугьузвайвал, тумар цунин серенжем виниз тир еридивди ва тайин вахтара кьилиз акъудда.
Магьсулдарри битмишарзавай набататрин чIехи пай суьрсетдин рекьяй хатасузвал таъминарзавайбур ва малдарвилин хилез герекбур я. Гьайванрин ем патал — тумар 96 агъзур гектарда, техил патал — 60 агъзур гектарда, майваяр – 40 агъзур гектарда, картуфар – 18 агъзур гектарда, бахчадин майваяр 7,2 агъзур гектарда цада.
Гзафни-гзаф тумар Къизляр, Хасавюрт, Тарумовкадин, Ногъай, Бабаюрт ва Леваша районрин чилерик кутада.
Агьмед Магьмудов
