Райондин администрациядин кьил Замир Азизов дяведин махсус серенжемда игитвилелди телеф хьайи Арабляр хуьряй тир Закир Къурбанован багърийрихъ галаз гуьруьшмиш хьана. Гуьруьшда райондин СВО-дин ветеранрин ассоциациядин ва «Память гор» ДРОО-дин чкадин филиалдин председатель Темирлан Султановани иштиракна.
Суьгьбетдин вахтунда Ватандин итижар патал чан гайи аскердин дидеди ва ваха яшайишдин рекьяй чпел ацалтзавай четинвилерикай ва хизандихъ авай игьтияжрикай лагьана. Замир Азизова дидединни вахан дердийрихъ дикъетдивди яб акална ва абуру къарагъарай вири месэлаяр вичин гуьзчивилик кутадайди, хизандиз герек куьмек гудайди хиве кьуна.
— Дяведин махсус серенжемда иштиракзвай гьар са аскердин ва абурун хизанрин гьакъиндай къайгъударвал авун чи вири жемиятдин кьилин везифа я, – лагьана Темирлан Султанова. – Чна Ватан патал чанар къурбанд авур гьар са кьегьал рикIел хуьн ва абурун хизанриз герек куьмек гун лазим я.
* * *
Райондин саки вири хуьрерай фенвай кьегьалри Украинада кьиле тухузвай дяведин махсус серенжемда дирибашвилелди иштиракзава. Абуру командиррин тапшуругъар, гьикьван четинбур ятIани, гъалибвилер къачуналди, тамамарзава. Гьахьтин рухвайрикай сад Гелхенрин хуьряй тир старший сержант Ризван Шагьпазов я. Женгинин расчетдин начальникдиз и йикъара уьлкведин Президентдин Указдалди «Жуьрэтлувиляй» медаль гана.
Ризван пулеметчикринни минометчикрин отделенидин командир я. Адан гъилик квай аскерри, Курскдин область миллетбазрикай, фашистрикай азад ийидайла, жуьрэтлувал, дирибашвал къалурна. Алай вахтундани ада вичин аскеррихъ галаз душман Донбассдин чилелай чукурзава, нацистриз дуьзгуьн ягъунар кьазва.
* * *
Райондин администрацияда муниципалитетдин кьил Замир Азизова дяведин махсус серенжемда телеф хьайи уьтквем хва Мамей Мамееван руш Дианадив государстводин шабагь вахкуниз талукьарнавай мярекат кьиле фена. 2024-йисан октябрдиз игитдиз «Жуьрэтлувиляй» медаль, 2025-йисан июлдиз Суворован орден ганвай. 2025-йисан гатуз фашистрихъ галаз кьиле тухузвай нубатдин женгина ам телеф хьана.
Государстводин шабагьар вахкунин гуьруьшда СтIал Сулейманан ва Кьурагь районрин военный комиссар Райзудин Женетова иштиракна.
Аскердин багърийрихъ элкъвена, Замио Азизова лагьана: «Мамей пара викIегь гада тир. Чна адал дамахзава. Адани ва чи хуьрерай фенвай маса кьегьалри чи уьлкведин ва хизанрин ислягь уьмуьр хуьзва. И кар патал абуру чпин чанарни къурбандзава».
СтIал Сулейманан районда
Республикада дяведин махсус серенжемда иштиракзавайбурун ва абурун хизанрин гьакъиндай къайгъу чIугвадай хейлин программаяр, проектар кардик ква. Муниципалитетрини, чпин мумкинвилериз килигна, абуруз жуьреба-жуьре куьмекар гузва.
Дяведин махсус серенжемдин иштиракчияр ва абурун хизанар гьамиша райондин администрациядин гуьзчивилик ква. Гуьруьшар тешкилзава, абурун дерди-бала чирзава ва яшайишдин месэлаяр гьялзава.
И барадай яз, муниципалитетди игьтияж авайбуруз хсуси кIвалер эцигдай чилин участокарни чара ийизва. ИкI, Украинадин миллетбазрихъ галаз кьиле физвай женгера уьтквемвал, жуьрэтлувал къалурзавай ЦIийи Макьарин хуьряй тир аскерриз – 14 касдиз – чилин участокар чара авуна. Алатай йисуз Вини СтIалрин хуьряй тир аскерар чилин участокралди таъминарна. Курхуьруьн, КIварчагърин, Кьасумхуьруьн администрацийрини орденар, медалар авай женгерин иштиракчийриз чилин участокар чара ийида.
– Хсуси кIвалер эцигдай чилер чара авун аскеррин хизанар патал яшайишдин рекьяй куьмек гунин лап хъсан серенжем я, – лугьузва райондин муниципалитетдин кьил Саид Темирханова.
Абад Азадов
