Тебрик
И йикъара чи машгьур ватанэгьли, вири Дагъустандин дамах, сенатор, Дагъларин уьлкведин кьегьал хва Сулейман Керимован 60 йис тамам хьанва.
И касдиз сифте нубатда чIехи жумартвал, захавал хас я. Ада вичин хайи республикадиз ганвай кьван куьмекар фикирда кьуртIа, Сулейман Керимоваз лайихлувилелди Дагъустандин дамах лугьуз жеда. ГьакI лугьунни ийизва – вири миллетри!
Яшайишдин гьи хел къачуртIани, и кьегьал хци абур вилик финик вичин пай кутунва. Хейлин мусурманриз (неинки са Дагъустандай) гьаждал фидай, чпин ферз кьилиз акъуддай мумкинвал гана Сулейман Керимова. И суваб авай кар гьар йисуз давам жезва.
Чи машгьур ватанэгьлиди авунвай кьван къени крар гьисабдиз къачуз хьайитIа, тамам ктабар кхьиз жеда. Къуй вичелай Аллагь рази хьурай, вичин берекатар мадни артух хьурай!
60 йис уьмуьр инсан чагъинда авай вахт я. Хейлин крар, месэлаяр, дердияр гьеле вилик кума. Къуй Сад Аллагьди Квез, гьуьрметлу Сулейман Абусаидович, абур вири кьилиз акъудун патал чандин сагъвални яргъи уьмуьр гурай!
«Лезги газетдин» редакциядин коллективди
Сулейман Абусаидовичаз хайи югъ мубаракзава
ва адахъ гьар са камуна агалкьунар, сагъвал, хушбахтвал хьана кIанзава
________________________________________________________________
Дагъустандин баркаллу хва
Вичикай суьгьбет физвай баркаллу инсан, лезги халкьдин дамахдин ва такабурлувилин ярж, михьи гъилин карчи Керимов Сулейман Абусаидович 1966-йисан 12-мартдиз Дербент шегьерда дидедиз хьана. Бубайрин бинеяр Докъузпара райондин къадим Къаракуьре хуьряй я.
Сулейманан буба Абусаида Дербент шегьерда — уголовный розыскда, дидеди сбербанкдин къурулушда бухгалтер яз кIвалахна. Сулейман хизанда гъвечIи аял тир. Жаван йисара ам дзюдодал ва путар хкажунин спортдал машгъул хьана. Жуьреба-жуьре акъажунра ада гъалибвилер къазанмишна. Сулеймана шегьердин 19-нумрадин юкьван школа тафаватлувилелди акьалтIарна. Ада дуьм-дуьз ва тIебии илимриз майилвал ийизвай, рикI алай предметни математика тир.
1983-йисуз юкьван школа акьалтIарай жегьил Дагъустандин политехнический институтдин эцигунардай факультетдиз гьахьна. Сад лагьай курсунилай гуьгъуьниз адаз Советрин Армиядин жергейриз эвер гана. 1984-1986-йисара, старший сержантдин чинда аваз, Сулеймана РВСН-дин расчетдин начальникдин везифаяр тамамарна. Армиядай хтайдалай гуьгъуьниз С. Керимова кIелун давамарна, амма Даггосуниверситетдин экономикадин факультетда. Ина кIелдай вахтунда С. Керимова профкомдин председателдин заместителдин везифаярни тамамарна. Диплом къачур жегьил «Эльтав» заводдин экономиствиле кьабулна. 1989-1995-йисара гьакъисагъвилелди зегьмет чIугвазвай ам жергедин экономиствилелай генеральный директордин куьмекчивилел кьван хкаж жезва.
1993-йисалай С. Керимов, «Эльтав» заводдин векил яз, Москвада кIвалахдив эгечIзава. 1995-йисуз ада Москвадин «Союз-Финанс» компаниядин генеральный директордин заместитель хьунин теклиф кьабулзава. 1997-йисуз адакай Москвадин международный корпорациядин институтдин илимдин къуллугъчи жезва.
1999-йисан февралдилай Сулейман хсуси ихтиярар авай карчивилин тешкилатдин вице-президентвиле хкязава. Гьа и йисан декабрдиз ам РФ-дин Государственный Думадин депутатвиле хкязава. 2008-йисалай Сулейман Дагъустан Республикадин Халкьдин Собранидин патай РФ-дин Федеральный Собранидин Федерациядин Советда векил я. С. Керимов пуд ва кьуд лагьай сеферда эвер ганвай Госдумадин депутатрин жергеда гьатзава.
Спорт вилик тухунай чи ватанэгьлидин алахъунар чIехибур я. 2005-йисуз «Нафта-Москва» компания Россиядин футболдин союздин спонсоррикай сад яз хьана.
2005-йисан ноябрдиз Виридуьньядин жуьреба-жуьре женгерин Федерацияди Сулейман Керимоваз виридалайни дережалу шабагьрикай сад тир «Къизилдин орден» гана. FILA-дин президентдини депутатдиз чIехи шабагь гана.
Къейдна кIанда хьи, С. Керимован «Нафта-Москва» компания азаддиз кьуршахар кьунай Россиядин хкягъай командадин спонсорни тир. 2006-йисан майдиз С. Керимова Россиядин спортдин акъажунрин федерациядин советдиз регьбервал гана. 2011-йисан январдиз ам футболдин «Анжи» клубдин иеси хьана. Футболдин клубдин игьтияжриз килигна, ада Каспий гьуьлуьн къерехда футболдин кьве базани арадал гъана.
Каспийск шегьерда «Хазар» стадион гегьеншарна, туькIуьр хъувуна. Ана 27 агъзур тамашачидиз чкаяр ава. Сулейман Керимова мергьяматлувилин гьерекатдикни еке пай кутазва.
Сулейман Керимован куьмекдин гъил алаз гьар йисуз са шумуд агъзур мусурманди Саудовдин Аравиядин пак чкайриз фин, гьаж кьиле тухун тешкилзава. Москвада ада, 170 миллион доллар серфна, Жуьмя мискIин, Махачкъалада Иса пайгъамбардин тIварунихъ галай мискIин эцигна. Алай вахтунда Мегьамед пайгъамбардин (с.а.с) тIварунихъ галай мискIин эцигунин кIвалахар кьиле физма. Дагъустандин Муфтиятди ва республикадин вири агьалийри Сулейман Абусаидовичаз рикIин сидкьидай сагърай лугьузва.
РикIел хкин, винидихъ къейднавай мискIин архитектурадин ва стилистикадин жигьетдай Мединада авай пак чкадиз тешпигьди жеда. Дагъустандин мискIиндин проектда музейни ачухун фикирдик ква. Ана ислам диндин тарихдихъ галаз алакъалу ядигарри ва багьаз хуьзвай затIари чка кьада. Дараматда 23 агъзур инсан гьакьда. Хайи Ватандин абадвал патал С.Керимова ийизвай мергьяматлувилин кIвалахрин сан-гьисаб кьаз хьун мумкин кар туш. Адаз вири дагъустанвийри, ватанэгьлийри баркалла, сагърай лугьузва. Алайди Сулейманан уьмуьрда лишанлу йис я: ада вичин 60 йисан юбилей къейдна. Чаз чи баркаллу ватанэгьлидихъ чандин мягькем сагъламвал, карчивилин рекье мадни еке агалкьунар хьана кIанзава.
Сулейман Керимоваз
Гьуьрмет – гзаф, хатур – азиз,
Пара кIанда вун чи рикIиз,
Ви мурадар фирай кьилиз
Гьар са карда, эхь, Сулейман.
Муъмин кас я элдиз даях,
Гьамиша рикI ачух, уях,
Мергьямат я дугъри кIвалах,
Жумарт я ви экв, Сулейман.
Мягькем хьурай къуй ви сагъвал,
КIубан хьурай гуьгьуьл – чагъвал,
Уьмуьр давам хьурай яргъалд,
Кьени я ви берт, Сулейман.
Пудкъад йисан сувар тебрик
Ийиз, ваз зун язва шерик
Шагьбалади, ачух яз рикI,
Бахшна ваз и бейт, Сулейман.
Шагьбала Шагьбалаев
