СтIал Сулейманан райондин Цмуррин хуьре кIелдай 100 чка авай цIийи школа-интернат эцигиз гатIуннава. Республикадин инвестицийрин программадин куьмекдалди хкажзавай и дарамат районда виридалайни кьакьанди жеда: 6 гьавадикай ибарат интернатда алай аямдин вири къулайвилер тешкилдайвал я.
Кьилди къачуртIа, ана классар, актовый ва спортдин залар, ктабхана, яшамиш жедай кIвалер ва маса чкаяр кардик кутада.
Къейд ийин хьи, цIийи школа-интернат идалай вилик Цмурдал меценат Марат Шайдаеван куьмекдалди эцигай мектебдин патав (адан алава са пай хьиз) хкажзава.
Муниципалитетдин кьил Саид Темирханован фикирдалди, цIийи школада-интернатда неинки хъсан еридин чирвилер гуда, гьакIни яргъал тир жуьреба-жуьре хуьрерай къвезвай аялар яшайишдин къулай шартIаралди таъминардай мумкинвални жеда.
«Лезги газет»
