СтIал Сулейманан райондин Эминхуьр «Ростов – Баку» шегьре рекьин мукьув гва. Малум тирвал, 1998-йисалди и хуьрел Аламише («еке там авай чка» лагьай чIал жезва) тIвар алай. Дагъустандин эдебиятдин классик Етим Эминан гьуьрметдай, адан 160 йис тамам хьуниз талукь юбилейдин мярекатрин сергьятра аваз, Аламишедин тIвар Эминхуьрелди эвезна.

Хуьруьз гьахьзавай рекьин къерехда Етим Эминан гуьмбет эцигнава. Къейд ийин, Эминхуьр Кьиблепатан Дагъустанда 1966-йисуз залзала хьайидалай кьулухъ Хутаргърин, Кьеанрин, ХпитIрин, ЦицIерин, Бигеррин ва Ялцугърин агьалияр куьч хьунин нетижада арадал атана.

Эминхуьруьн агьалияр асул гьисабдай ципицIар, помидорар, техил цунал машгъул я. Чи йикъара ам вилик фенвай, чIехи хуьрерикай сад я: ана 3300 кьван агьалияр яшамиш жезва, 162-далай виниз майишатар ава.

Хуьруьн килигуниз лайихлу чкайрик Етим Эминан музей ва гуьмбет акатзава.

Мурад Мегьамедкеримован

«СтIал Сулейманан район: ­тарихдин гелерай» ктабдай.