Ахцегь районда мектебра кIелзавай аялриз Ватандин тарих, бубайрин адетар ва медениятдин ирс чирдай медениятдинни марифатдин центр ахъайдайвал я. Идакай вичин телеграм-каналда муниципалитетдин кьил Абдул-Керим Палчаева хабар гана.
И месэладиз талукь проект гьазурун патал мукьвара А.-К. Палчаева Дагъустандин жемиятдин тешкилатрин теклифар кьилиз акъудиз куьмекзавай центрадин векилрихъ – Эйлихан Мирзеагъаевадихъ, Екатерина Смирновадихъ ва Серми Агьмедхановадихъ – галаз гуьруьш кьиле тухвана.
Центрадин векилри Ахцегь районда авай чIавуз чкадин мектебра кIелзавай аялрихъ галаз гуьруьш тешкилна. Абур гележегда центрадиз къведай ксар я. Проект кьилиз акъудиз эгечIдалди вилик аялрихъ гьихьтин фикирар, къастар аватIа чир хьуни центрадин кIвалах гуьнгуьна тваз куьмекда. Кьилди къачуртIа, акьалтзавай несилдин векилри чпиз чизвай адетрикай, хизанриз талукь агьвалатрикай ахъайна, цIийи центрада гьихьтин кружокар кардик кутуртIа хъсан ятIа лагьана.
Са шакни алачиз, аялар патал медениятдинни марифатдин центр кардик кутуни акьалтзавай несилдин векилар хайи чилин, диде-бубадин къадир авай халис ватанпересар яз чIехи авунин карда кьетIен чка кьада. Ихьтин маканар вири районра хьайитIа, мадни хъсан я.
Агьмед Магьмудов
