И йикъара Мегьарамдхуьруьн райондин Ярагъ-Къазмайрин хуьре 320 ученикдиз чка жедай цlийи мектеб ачухна. И гьакъиндай «Лезги газетдиз» райондин администрациядин пресс-къуллугъди хабар гузва.
Къейд ийин, тlвар кьунвай мектебдин дарамат эцигунин кlвалахар 2017-йисан майдиз гатlуннай. Цlийи мектеб кардик кутунин игьтияж и хуьре фад авай.
Шад гьалара мектеб ачухунин мярекатда Мегьарамдхуьруьн райондин кьил Фарид Агьмедова. РД-дин медениятдин ирс хуьнин агентстводин руководитель Заур Къагьриманова, Рд-дин кьилин советник Мусаэфенди Велимурадова ва хейлин маса мугьманри иштиракна.
Цlийи мектебда алай аямдин вири жуьредин шартlар тешкилнава. Мугьманрин дестеди дараматдин къенепатаз, патарив гвай мулкариз килигна. Гьаятда спортдин са шумуд майдан, аялрин майдан ва ял ядай парк туькlуьрнава.
Эхирдай мектебда кlелзавай аялри, райондин медениятдин макандин къуллугъчийри концерт гана.
«Лезги газет»
