Алай йисан 3-сентябрдиз Докъузпара райондин администрациядин дараматда Абдурагьим Алискеров кьиле аваз нубатдин совещание кьиле фена. Ана райондин Кьилин заместителри, райондин идарайрин ва тешкилатрин начальникри ва хуьрерин администрацийрин кьилери иштиракна.

Малум тирвал, 3-сентябрь – им чи гьукуматдин тарихдин пашман югъ я. 2004-йисан гьа и юкъуз Беслан шегьерда гзаф пис терактдин вакъиадикди инсанрин чанар къурбанд хьана. Адахъ галаз алакъалу яз, къурбанд хьанвай чанар рикIел хкун патал А. Алискерова совещание секинвилин декьикьадилай башламишна.

Адалай кьулухъ райондин Кьили совещанидин иштиракчияр вилик квай месэлайрихъ галаз танишарна. Гьамиша хьиз, и сефердани вилик квай кьилин месэла налукар кIватIуникай, кIвалер ва чилер актуализация авуникай тир. И месэладин жигьетдай кIвалах гьикI кьиле физватIа суьгьбетун патал экономикадин отделдин начальник Султанмурад Магьмудоваз гаф гана. Ада хуьрерин администрацийри кIватIнавай налукрин рекъемрикай малумарна.

Совещанидал школаяр чими ийидай сезондиз гьазурвал акуниз талукь месэлани веревирдна. А. Алискерова и месэла технический отделдин начальник Фазил Сурхаевал тапшурмишна.

Адет хьанвайвал, гьар йисан 14-сентябрдиз чи районда «Манияр лугьузвай симер» музыкальный фестиваль кьиле физва. Адалай гъейри, вилик, 15-сентябрдин юкъуз, Дагъустандин халкьарин садвилин югъ – сувар ква. Райондин Кьил Абдурагьим Алискерова, Дагъустандин халкьар сад ва къуватлу авунвай и суварин важиблувиликай къейдна. Адахъ галаз алакъалу яз, ада вичин заместитель Салигь Гьажимурадоваз ва медениятдин управленидин начальник Беглер Бабаеваз и суварин мярекатриз кутугай жуьреда гьазурвилер акун патал талукь тир тапшуругъар гана.

Эхирдай алай йисан 9-сентябрдиз Каракуьре ва ЦIийи-Каракуьре хуьрера кьиле фидай депутатар хкягъдай сечкийриз гьазурвал акунин месэла веревирдна.

А. ЭМИРСУЛТАНОВ