Алай йисан 27-августдиз Ахцегь хуьре авай Докъузпара ва Ахцегь районрин тIебии газдин абонентрин пунктунин дараматда газ ишлемишзавай агьалийриз талукьарнавай совещание кьиле фена.

Анал Докъузпара ва Ахцегь районрин пунктарин  тIебии газдин абонентвилин  къуллугъдин начальник Нияз Амаханова, Докъузпара райондин и рекьяй кIвалахзавай чIехи мастер ва тIебии газдин  рекьяй майишатдин  начальник Къенбер Агьмедова, газ ишлемишзавай абонентрал гуьзчивал тухузвай Валидин Эмирсултанова иштиракна.

Нияз Амаханова лицевой счет ахъай тавуна, къанундалди ихтияр авачиз  тIебии газ ишлемишзавай абонентриз еке жермеяр эцигдайдакай лагьана.

— Сифте кьилелай тIебии газ кутун патал ЭГС-дин къуллугъдиз арза кхьин герек я. Герек документар кIватIайдалай кьулухъ, абур тIебии газдин абонентрин пунктуниз лицевой счет ахъаюн патал  чав агакьарзава. Ахпа чна лицевой счет ахъайна, газ кутадай ихтиярар гузва, — лагьана Н.Амаханова.

Ада газ ишлемишзавай хуьрерин абонентриз счетчикдал алай рекъемар гьар вацра, вахт-вахтунда, чуьнуьх тавуна къалуруникай  ва газ ишлемишнавай пул вахт-вахтунда гунин чарасузвиликай лагьана.

Къенбер Агьмедова газдин линиядик цlийиз кутаз кIанзавай агьалийриз гьихьтин документар герек жезватIа лагьана.

Эхирдай Нияз Амаханова ва  Къенбер Агьмедова Докъузпара райондин Кьил Абдурагьим Алискероваз   районда чпи тухузвай кIвалахдин рекьяй герек тир куьмекар гунай  чухсагъул  малумарна.

«Лезги газет»