Махачкъалада В. Макаровадин тIварцIихъ галай женгерин баркалладин музейда «Ватандин Игитар» тIвар алаз Москвадин художник Михаил Чернован выставка ачухнава. И карда адаз республикадин жемиятдин палатади куьмек гана.
Художникди СВО-дин иштиракчийрин, Россиядин Игитар тир 18 дагъустанвидин портретар музейдиз вичин патай багъишна.
Выставкадихъ еке метлеб ава. Экспозиция дяведин махсус серенжемдин иштиракчийрин, женгера телеф хьайи аскеррин, офицеррин, абуру гъалибвилер къачузвай чкайрин фикир желбдай тегьерда чIугунвай суьретралди, шикилралди девлетлу я. Махачкъалада хьиз, ам республикадин маса шегьерра ва районрани къалурда.
Проектдихъ гьам художественный ва гьам жемиятдин метлеб ава. Ада тарихдин вакъиаяр рикIел хуьниз, гражданвилин, ватанпересвилин ерияр кутуниз, несилрин алакъаяр мягькемаруниз ва Ватан хуьнин карда чанар къурбанд авур ксарин хизанриз куьмек авуниз къуват гузва.
Выставкадиз килигайдалай гуьгъуьниз музейдин директор Жанет Сагидова, Россиядин Игит Загьид Загьидова, Дагъустандин ветеранрин советдин председатель, полковник Магьарам Алиджанова чпин фикирар лагьана, музейдиз Ватандин ЧIехи дяведин иштиракчи дагъустанвийрикай кхьенвай рикIел хуьнин ктаб багъишна.
Выставкадиз килигиз жегьилрин, волонтеррин, дяведин ва ватанпересвилин организацийрин векилар атанвай.
Художник М. Черноваз ватанпересвилин темадиз кьилин фикир гузвайвиляй Дагъустандин жемиятдин палатади гьуьрметдин грамота гана.
Абад Азадов
