И йикъара Дербент шегьердин телеграм-каналдай чаз шикилни галаз ганвай ихьтин хабар акуна: «Белижви младший лейтенант Фаталиев Мурад Зульфикъаровича 2022-йисалай Харьковдин, Херсондин, Бахмутдин патарив ва Волчанск шегьерда махсус военный серенжемда иштиракна. Пуд сеферда адал залан хирер хьана. Гьар сеферда, саки сагъ хъхьун тавунмаз, бедендик хкудиз тежедай ракьун кIусарни кумаз, Ватандизни кьинез вафалу, руьгьдиз мягькем хва, къуллугъдивай къерех тахьана, мад вичин женгинин юлдашрин патав хъфена. Ада СВО-да иштирак авун давамарзава. Са шумуд шабагьдин сагьиб алай вахтунда госпиталда ава».
Зи уьмуьрдин юлдаш, лезги чIаланни литературадин муаллим Гъулангерек Ибрагьимовади, шикил акунмазди, заз ам билбилхуьруьнви Зульфикъаран гада я, ам хъсан къилихрин ученик тир лагьана.
Чун Россиядин Игит Муслимов Муслим яшамиш хьайи куьчеда авай Зульфикъар Фаталиеван кIвализ мугьман хьана.
Къейд ийин хьи, фадлай чизвай и хизандин тухум военнийринди я. Мурадан дахдин ими Фаталиев Мевлудина Белижда авай ПВО-дин военный частуна прапорщик яз 42 йисуз къуллугъна. Мевлудинан гада Русланни офицер я. Майорди СВО-да къуллугъзава. Зульфикъаран иранбуба Ибрагьимани 40 йисуз, прапорщик яз, армиядин жергейра къуллугъна. Зульфикъарани багърийрин рехъ хкяна, сергьятар хуьдай частара прапорщик яз къуллугъна. З. Фаталиев ученияр кьиле физвай вахтунда хьайи хирерикди госпиталдиз аватна. 2024-йисуз операция авуна. Военный медкомиссияди, сагъламвилин гьалдиз килигна, адаз военный къуллугъ давамардай ихтияр ганач. Сагъламвал мягькемар хъийиз, ам кIвале ава.
Зульфикъаран гада Мурад Фаталиев 1996-йисуз Белиж поселокда дидедиз хьана. СССР-дин Игит Абас Исрафилован тIварцIихъ галай Белиждин гимназия ада 2013-йисуз хъсан къиметар аваз акьалтIарна. Пешекарвилин образование къачуз кIвалин патав гвай хуьруьн майишатдин аграрный колледждик экечIна, вижевай чирвилер къачуна.
2016-йисуз М. Фаталиеваз армиядин жергейриз эверна. Ам Москва шегьердин къваларив гвай военный частуниз акъатна. Чешнелудаказ къуллугъ авур адаз командованиди, икьрар кутIунна, къуллугъ давамарун теклифна. КIвализ хтай са пуд вацралай ада теклиф кьабулна.
2017-йисуз Мурад Фаталиев, кутIуннавай икьрардин бинедаллаз, Мурманскдин областдин Алакуртида авай мотострелковый бригададиз ракъурна. Са йисалай къуллугъда къазанмишнавай агалкьунрай адаз сержантдин чин гана, ам отделенидин командирвиле тайинарна.
2022-йисан майдиз ада къуллугъзавай бригада Харьковдин область галай патахъ, миллетчийрихъ галаз женг чIугваз ракъурна. Ина адан отделиниди са шумуд хуьр азадзавай женгера иштиракна. Ахпа абур тамун зулар миллетчийрикай михьи ийиз ракъурна.
Октябрдин вацра Херсон хуьзвай женгер къатибур хьана. М. Фаталиева «Корнет-М» ПТРК-дай (противотанковый ракетный комплекс) са танк яна, кьвед лагьайди ягъиз лишан кьаз гъазурвал аквазвай арада ам алай чка миллетчийри сифте танкунай, адан гуьгъуьналлаз дрондай яна. Залан хирер хьанвай ам галай юлдашри далу патаз акъудна. Сифте куьмек гайидалай гуьгъуьниз ам госпиталдиз ракъурна. Духтурри адан бедендик квай ракьун кIусар гьисабайла, абурун кьадар цIуругудав агакьнавай. Операция авуна, гзафбур хкудна. Сагъламвилиз зиян гун тийизвай ругуд кIус кумаз, ам госпиталдай ахъайна.
2023-йисуз Фаталиев ДНР-да авай 200-бригададиз ракъурзава. Ина ада «Корнет-М» ПТРК гваз Часов яр, Ждановка, Калиновка миллетчийрикай азадзавай женгера иштиракна, вич дагъвидин руьгь авай халис кьегьал хьиз къалурна.
2024-йисан гатфариз Бахмутда кьиле фейи женгера Мурада вичин женгинин юлдашдихъ галаз ПТРК гьазурзавай вахтунда, миллетчийрин дронди абурал хъиткьиндай затI вегьена. Галай юлдаш чкадал кьена. Мурадал мад залан хирер хьана.
2025-йисуз командованиди Мурадал Херсондин къвалав гвай, Днепр вацIун юкьва авай кьураматрал алай чи дестейрив яракьар, недай суьрсет агакьарунин ва хирер хьанвайбурни телеф хьанвайбур чи патахъ хкунин везифа тапшурмишна. Им регьят кIвалах тушир. Миллетчийрин дронар гвайбуру гьамиша чи кьегьалрал гуьзчивалзавай. ГьакI ятIани, Мурада вичин женгинин юлдашрихъ галаз командованиди эцигнавай везифаяр тамамдиз кьилиз акъудна. Херсондай ам авай рота Волчанскдиз ракъурна. Иниз хтайла, адав шад хабар агакьна: 2025-йисан июндиз РФ-дин Миноборонадин приказдалди старший сержант Мурад Фаталиеваз младший лейтенантдин чин гана. Офицер къуллугъдин рекьяйни хкажна, ам гьужумдай взводдин командирвиле тайинарна.
Нубатдин гьужумдин женгина адал мад залан хирер хьана. Исятда Мурад Санкт Петербургдин патав гвай Гатчинада госпиталда ава.
Женгера къалурай кьегьалвилерай, дирибашвиляй адаз «СВО-дин ветеран», «Жуьрэтлувиляй» медалар, Суворован, Пак Георгиян 4-дережадин орденар ганва.
Чи виридан мурад, ам фад-фад сагъ хъхьана, гъалиб хьана, саламатдиз кIвализ хтун я.
Къагьриман Ибрагьимов
