Гатфарин тумар цунин кампаниядин вилик Дагъустанда тумарин ери ахтармишда. Ихьтин серенжемар кьабулунин игьтияж алатнавай хъуьтIуьн кьетIенвилер фикирда кьуналди арадал атанва: ам гзаф живер къвайиди ва ламуди хьана. «Россиядин хуьруьн майишатдин центр» ФГБУ-дин республикада авай филиалдин пешекарри къейдзавайвал, алай вахтунда авай тIебиатдин шартIари тумар хуьнин месэладиз кьетIен фикир гун истемишзава. Гьамбарханайра ламувал винизди ва чимивал садлагьана гагь виниз, гагь агъуз хьуни ана хуьзвай тумариз мурс ягъунал ва я цайи тумарин чIехи пай экъечI тавунал гъун, идалди гележегдин бегьердин кьадар хаталувилик кутун мумкин я.
Идахъ галаз алакъалу яз лежберриз чпихъ авай тумарин ери ахтармишуниз, абур цун патал бакара къведайбур ятIа, гьакIни гьикьван кьадарда аваз цана кIанзаватIа виликамаз чируниз эвер гузва.
Гатфарин магьсулар цадай вахтуниз гьазурвал акунин сергьятра аваз, Дагъустан Республикада Россельхозцентрадин филиалдин пешекарри герек тир ахтармишунар тамамдаказ кьиле тухудайвал я. Абуру тумарин михьивал, экъечIунин энергия, агъзур тумунин заланвал, ламувал, гьакIни зиянкар гьашаратар ва азарар кваз хьун-тахьун ахтармишда.
РикIел хкин, алай йисуз Дагъустанда хуьруьн майишатдин 369 агъзур гектардин мулкара магьсулар цадайвал я. Гатфарин магьсулар нетижалудаказ цун патал 11 агъзур тонндилай гзаф техил лазим жеда. Гележегдин бегьер патал гьакIни 90 тонн майвайрин культураяр ва 50 агъзур тонн картуфар цада.
Саида Мурадова
