Халкьарин садвал

Россиядин халкьарин садвилин йисан сергьятра аваз, уьлкведа ва регионра жуьреба-жуьре мярекатар тешкилзава. Абурун арада чирвилерин проектарни ава. Россиядин «Знание» обществодин  Дагъустандин филиалдин директор Шевкет Крумова къейд авурвал, Кеферпатан Кавказдин вири регионра Урусатдихъ галаз алакъалу тарихдин ва санал яшамиш хьунин девиррикай гегьенш малуматар гудай «Россиядин Кавказ» форумар ва маса мярекатар тухудайвал я.  Анриз сифте нубатда школьникар, студентар, зегьмет чIугвазвай жегьилар, гьукумдин органрин къуллугъчияр ва диде-бубаяр желбда.

— Мярекатрин кьилин макьсад респуб­ликадин агьалийриз Урусатди Кавказдин мулкар вилик тухуник кутур пай гьихьтинди ятIа гьадакай малуматар, чирвилер гун я. Тарихдай чаз чизвайвал, халкьар чеб чпиз тир, абурун арада къалмакъаларни тIимил жезвачир. Идакай чапхунчийрини менфят къачузвай. Къе чун вири са уьлкведин къурулушдик ква ва Кеферпатан Кавказдин республикайрихъ вири рекьерай вилик фидай мумкинвилер ава,  – лагьана Ш. Крумова.

Талукь проектдин сергьятра аваз, вири мярекатра тарихчийри, жемиятдин активный векилри ва агъсакъалри иштиракда ва абуру Дагъустанди Россиядин гьукуматдик кваз къазанмишнавай агалкьунриз талукь делилрикай, тарихдин важиб­лу вакъиайрикай суьгьбетда.

Республикадин «Улу-бубайрин сес» про­ектдин сергьятра аваз, акьалтзавай­ не­сил сиясатда, экономикада, илимда­, культурада, искусствода, спортда ва об­щест­венный крара агалкьунар къа­зан­миш­навай яшлу инсанрихъ, ветеранрихъ галаз гуьруьшмиш жеда. Ихьтин мярекатар клубра, библиотекайра, театррин залра ва гьакI ачух майданрални кьиле ту­худа.

Россиядин халкьарин садвилин йисан гьуьрметдай «Чирвал – устадвал» проект­ни кардик кутунва. Ада халкьдин художественный сеняткарвилин рекьяй мастер-классар тешкилда. Аялриз, жаван­риз кIа­рас, хам, сар, чеб, къизил, гимиш гьялзавай, абурукай гуьрчег безекар гьазурзавай устIарривай вердишвилер, чирвилер къачудай мумкинвал гуда. Идан макьсадни чал улу-бубайрилай агакьнавай ирс хуьн, ам гегьеншарун ва вилик тухун, устIарвилин кеспи кIанарун я.

«Знание» обществодин филиалди Да­гъустандин спортдин министерстводихъ галаз санал машгьур спортсменрин, олимпиададин, дуьньядин, Европадин, уьл­кведин чемпионрин иштираквални аваз, спортдин зурба форумар тешкилда. Сагълам уьмуьр тухуникай авай хийирдикай лугьунихъ галаз сад хьиз, форумрин иштиракчийрихъ галаз тарихдин важиблу вакъиаяр веревирд ийида, государстводин яржар тир Россиядин гимндин, пайдахдин метлебар ачухарда, халкьарин дуст­вилин темадиз кьилин фикир гуда. Халкьарин дуствал себеб яз, уьлкведи къазанмишай агалкьунрикай суьгьбетда.

Абад  Азадов