Мукьвара СтIал Сулейманан райондин Сардархуьруьн юкьван мектебда 5-классда кIелзавай Рагьимат Аллагькъулиевади Дагъустандин бажарагъ авай аялар вилик тухунин «Альтаир» центрада тешкилай «Битва за Кавказ» шикилар чIугунин республикадин конкурсда иштиракна. Рагьимат Аллагькъулиевади конкурсда 2-чка кьуна, ам Дагъустан Республикадин образованидин ва илимдин министр Я. Бучаеван къул алай дипломдиз лайихлу хьана. Дипломни Рагьиматав райондин кьил Саид Темирханова вахкана.
Рагьиматахъ маса конкурсрани олимпиадайра кIвенкIвечи чкаяр кьунай ганвай са шумуд диплом, грамотаяр ава. С. Сулейманан 155 йисан юбилейдиз талукьарна шикилар чIугунай тухвай конкурсда 3-чка кьунай Р. Аллагькъулиевадиз мергьяматлувилин «Умуд» фондунин патай пулдин премия гана.
Чаз малум хьайивал, Рагьиматахъ кIелунра, конкурсра агалкьунар хьуник адан дидедин — муаллим, Дагъустан Республикадин образованидин отличник, ингилис чIалан муаллимрин райондин Ассоциациядин руководитель, «2023-йисан муаллим» конкурсдин муниципальный этапдин призер Аллагькъулиева Саида Нуралиевнадин пайни ква. ГьикI лагьайтIа, Рагьиматаз вичин диде чешне я. Дидедилай чешне къачуналди, Рагьиматахъни чIехи хьайила муаллим хьунин къаст ава. Чи мурад алакьунар авай аялдихъ мадни чIехи агалкьунар хьун я.
Хазран Кьасумов
