Виридуьньядин ЮНЕСКО-дин ирс яз гьисабзавай, Россияда виридалайни куьгьнеди тир Дербентдин Жуьмя мискIин цIийикIа туькIуьр хъувунин кIвалахар давам жезва.
Дербентдин музейдин-заповедникдин пресс-къуллугъди хабар гайивал, эцигунардайбуру минарадин кIукI мягькемарнава ва марфарикай, живерикай хуьдай махсус материалдалди кIевирнава. УстIарри гьакI къадим цлар куьгьне палчухдикай гъилералди михьзава. МискIиндин кьиблепатахъай накьвадин кIвалахар тамамарзава. Тарихдин метлеб авай чкаяр ачухун патал 90 сантиметрдив агакьна накьв алудзава. Гьа са вахтунда хандакIарни мягькемарзава.
Жуьмя мискIин цIийикIа туькIуьр хъувунив 2019-йисуз эгечIнай. Эцигунардайбуру хиве кьунвайвал, гъилевай йисан гатуз вири кIвалахар куьтягьда.
«Лезги газет»
