Ядерный яракьар гуз кIанзава

Великобританияни Франция Киевдив­ ядерный яракьар вугуниз гьазур жезва­. «РИА Новости» чешмеди хабар гузвай­вал, ихьтин фикир РФ-дин СВР-дин (Служба внешней разведки) пресс-бю­роди раижнава.

«Лондонди ва Парижди Киев ядерный бомбайралди яракьламишунин гьазурвилер аквазва. Британиядинни Франциядин вилик-кьилик квайбурувай магълубвал эхиз жезвач. Атомдин ва я «кьацIай бомбайрин» яракьралди таъминаруналди, абуруз Киев патал женгинин гьерекатар са кьадар хийирлу шартIаралди акьалтIардай мумкинвал гуз кIанзава», — кхьенва малуматда.

Германияди лагьайтIа, СВР-дин делилралди, ихьтин серенжемда ишти­ра­куник кьил кутунач. Къейдзавайвал, уьл­квейри арадал атанвай гьалдин усалвал­ аннамишзава: ВСУ-дин гъилералди­ абу­рувай Россиядин винел гъалибвал­ къа­занмишиз жедач. Гьавиляй абуру­ ядерный яракьдин месэладал кIва­лах­зава.

«Ихтилат Европадин тадаракар ва технологияр, кьилди къачуртIа, цин кIа­никай фидай М51.1 луьткведин (французрин) ракетайрин са акьван еке тушир TN75 паяр чинебадаказ вугуникай физва», – кхьенва СВР-дин малуматда. Чпин чIуру ниятри международный ихтиярар векъидаказ чIурзавайди чизвайвиляй, Британиядини Францияди ахьтин кьуьруьк акъудзава хьи, гуя Украинади ядерный яракь вичи арадал гъизва. Амма, Россиядин разведкадин гафаралди, абуру жавабдарвиликай хкечIуник чIангьакьа умуд кутазва.

«Сирлу вири крар якъин жеда. Великобританиядинни Франциядин военный, сиясатдин ва дипломатвилин къуллугърал алай ксарик акьуллудаказ фикир ийиз­вай, чпин регьберрин фагьумсузвилин гьерекатар себеб яз вири дуьнья патал хаталувал арадал гъун мумкин тирди кьатIунзавай ксар тIимил квач», – алава хъийизва СВР-ди.

Британиядинни Франциядин парламентриз талукьарнавай малуматда Сов­федди (РФ-дин Федеральный Собранидин Федеральный Совет) къейднавайвал, Украинадив ядерный яракьар агакьарунин барадай жавабдарсузвилелди гафар-чIалар сад авуни мусибатдин гьалар арадал гъун мумкин я.

Малуматда мадни къейднавайвал, Британиядини Францияди Украинадиз ядерный яракьар ракъурун абуру саналди Россиядал гьужум авур мисалдиз барабар жеда. «Лондондани Парижда чир тахьана жеч хьи, РФ-дин Ядерный доктринадал асаслу яз, ядерный яракьар авачир уьлкведин патай ядерный яракьар авай уьлкведин куьмекдалди аксивилер авун – им абурун умуми гьужумдиз хьиз килигдай месэла я», – лагьанва Сов­феддин  документда.

Идалайни гъейри, «Лента.ру» чешмеди хабар гузвайвал, Великобританияди чпин кьушунар Украинадиз ракъурунал машгъул жедай махсус штаб арадал гъанва. «Гзаф миллетрикай ибарат къуватар арадал гъунин сергьятра аваз ва гуьгъуьнлай кьушунар Украинадиз ракъу­рун патал Великобританияди 70 касдикай ибарат штаб арадал гъанва», — лагьанва уьлкведин гьукуматдин официальный сайтдин малуматда.

Къейдзавайвал, Британиядин кьушунар гьазурунин месэладиз гьукуматди 200 млн стерлингрин фунт чара ийизва.

Мад тIалабзава

Владимир Зеленскийди Евросоюздиз­ Украина аник кутунин месэла яргъал вегьин тавуниз эвер гана. Адан гафаралди, уьлкве ЕС-дик экечIдай тайин йис, югъ малумарун герек я. «Заз тайин югъ чир хьана кIанзава. За идан гьакъиндай тIалабзава», – лагьанва Зеленскийди «Financial Times» чешмедиз гайи интервьюда.

Зеленскийди къейднавайвал, Украина Евросоюздик 2027-йисуз экечIун лазим я. ГьакIни ада лагьанва хьи, алай вахтунда Россияни Украина къалма­къал «акьалтIарунин сифте кьилив» агакьнава. Гьа са вахтунда адаз женгер акъвазарун патал хатасузвилин жигьетдай вич кьиле авай уьлкведиз мягькем заминвилер гана кIанзава.

Жавабдин серенжем 

Гьукуматдин кьиле авайбур дегишарунин макьсаддалди Украинади Венгриядиз талукь яз нафтIадин жигьетдай къадагъаяр эцигунин серенжемар кьилиз акъуднава, амма Будапештди илаж жа­гъурда. Ихьтин фикир 24-февралдиз Венгриядин премьер-министр Виктор Ор­бана малумарнава. «Украинвийриз вуч ва вучиз ийизватIа, тайиндиз чизва. Абуруз Венгрияда сечкияр жедалди кьве гьафтедин вилик кудай затIунин кьитвал ва бензиндин къимет 1 агъзур форинт хьана кIанзава. Абуру и кар чи гьукуматдин кьиле авайбур къуллугъдилай алудунин ва абурун чкадал Киевда авай гьакимдиз менфят хкатдайбур эцигунин мурад аваз ийизва», – кхьенва Орбана соцсетда.

18-февралдиз Венгрияди Украинадиз дизелдин кудайди агакьарун акъвазарна, 20-февралдиз лагьайтIа, Евросоюздин патай Киевдив 90 миллиард евро кредит вугунин месэла акъвазарна. Къейдзавайвал, кредит вугунин месэла та РФ-дай нафт къачунин кар гуьнгуьна хутадалди къуватдай вегьенва. Венгриядин МИД-дин кьил П. Сийяртодин гафаралди, ихьтин серенжем Киевдин режимди сиясатдин багьнайралди нафтIадин «Дуствал» турбадай Россиядин газ агакьарунин кар гуьнгуьна хтун тавуниз жаваб гун яз кьабулнава. Алава хъийизвайвал, Киевди ибур Венгрияда энергетикадин жигьетдай нагьакьан гьалар арадал атунин ва ида апрелдиз кьиле фидай сечкийриз пис патахъай таъсир авунин макьсаддалди акъудзавай кьуьруькар я.

Махсус серенжемдикай

РФ-дин оборонадин министерстводи хабар гузвайвал, 24-февралдин йифен вахтунда ПВО-дин такьатрин куьмекдалди Украинадин 79 беспилотник кьуна ва тергна. Абур чи уьлкведин са шумуд региондал ахъайнавай: Белгороддин, Саратовдин, Курскдин, Ростовдин областрал, Краснодардин крайдал, бязи гьуьлерин кьилел (Черное и Азовское моря), Крым ва Адыгея рес­публикайрал.

Чи аскерри 24-февралдиз Запорожье­дин областда авай Риздвянка хуьр тамамдиз азадна. «Кьиблепад» кьушунрин аскерри лагьайтIа, 52 блиндаж ва далдаламиш жедай чкаяр, гьакIни мидядин БПЛА-дин алакъадин 25 антенна тергна. Хабар гузвайвал, женгер кьиле физвай маса чкайрани чибуру викIегьвилер къалурзава.

«Лезги газет»