21-февралдиз Дагъустандин Кьил Сергей Меликов Дербент райондиз ва шегьердиз мугьманвилиз фенвай. Ина ада «Жуьрэтлувиляй» кьве ордендин сагьиб, гвардиядин подполковник Нариман Шихалиеваз бюст ачухунин мярекатда иштиракна. Ада гьакI райондин яшайишдин объектар авай гьал ахтармишна ва район вилик тухуниз талукьарнавай совещание кьиле тухвана.
Мугьманвилин сергьятра аваз, С. Меликов Россиядин Игит Муслим Муслимован багърийрихъ галазни гуьруьшмиш хьана. Ада Белиждин поселокда кучукнавай Игитдин сурал цуьквер эцигна. Муслимован буба Жавид Муслимоваз ва багърийриз башсагълугъвал гана. Региондин Кьили Игитдин багърийрив «Дагъустан Республикадин вилик лайихлувилерай» ва «Жуьрэтлувиляй» орденарни вахкана.
«Чун Муслимахъ галаз адакай Игит хьайидалай гуьгъуьниз гуьруьшмиш хьанай. Ада заз вичикай пара хуш фикир тунай. Адакай гележегда военный рекьяй чIехи дережадин къуллугъчи жедайдахъ зун инанмиш тир. Вучда, ара-бир чаз кIандайвал жезвач, лап хъсан инсанар дуьньядилай физва. Зи патай башсагълугъвал кьабула. Гьикьван гьайифдин кар ятIани, чавай са затIни дегишариз хъжедач. Ам рикIе аваз яшамиш хьана кIанда. Адахъ пара хъсан балаяр ава. Гила чи везифа абур патал вири крар авун я», — лагьана Сергей Меликова.
Муслим Муслимова мотострелковый 74-бригадада къуллугъзавай. СВО-дин сифте вацралай ада кIвенкIве жергейра аваз женг чIугуна. Жергедин аскер офицердин дережадал кьван хкаж хьана. Женгера къалурай викIегьвилерай 2024- йисуз адаз Россиядин Игит лагьай тIвар гана.
Абад Азадов
