Эменни маса гудайла, НДФЛ (налог на доходы физических лиц) гун тийидай дуьшуьшар гьихьтинбур я? И суалдиз РД-дин МФЦ-дин кьилин идарадин пешекарри жаваб гана.
Малум тирвал, алатай йисан 1-январдилай кьилдин ксар патал НДФЛ-дин кьадарар ихьтинбур я:
— санлай къачур йисан къазанжидин кьадар 2,4 миллион манатдилай тIимил ятIа, – 13 %;
— 2,4 миллион манатдилай артух къазанжидин кьадардилай – 15 %;
— РФ-дин резидентар туширбур патал – 30%.
Эгер юзан тийидай эменни хсусиятда аваз 5 йис ятIа, ам, налог тагана, маса гуз жезва. Эгер объект (кIвал) хсусиятда аваз 3 йис ятIа, ам ирс яз гьалтнаватIа ва я пишкешунин икьрардалди ганватIа, гьакIни приватизироватнаватIа, авай-авачир тек са кIвал ятIа, и дуьшуьшрани, маса гудайла, адал налог къвезвач.
Аялар галай хизанар налог гуникай азад жезвай дуьшуьшар ихьтинбур я:
— эгер 2 ва я идалайни гзаф аялар аватIа (18 йисал кьван яш тамам хьанвайбуруз ва я очный къайдада кIелзавай, чпин яшар 24 йисав агакь тавунвайбуруз талукь я);
— маса гайи йисуз ва я гуьгъуьналлай йисан 30-апрелдалди цIийи кIвал къачунваз хьайитIа;
— цIийи кIвал маса гайидалай еке ва я багьа тирла;
— маса ганвай эменнидин кадастрдин къимет 50 млн манатдилай алатнавачирла;
— хизандихъ майдандиз чIехи маса кIвал авачирла.
«Лезги газет»
