МВД-дин хроникадай
Дагъустанда аялрин бахчадин къуллугъчийриз гьакъи гун патал чара авунвай бюджетдин такьатар чуьнуьхнавайвилин гьакъиндай уголовный дело къарагъарнава. Идакай чаз РД-дин МВД-дин пресс-къуллугъди хабар гузва.
Силисдин управлениди «Центр по обслуживанию деятельности образовательных учреждений, расположенных в зонах отгонного животноводства» тIвар алай гьукуматдин идарадин бухгалтердиз талукь яз Россиядин УК-дин 159-статьядин 4-паюнай (еке кьадардин такьатрихъ галаз алакъалу яз авунвай лутувал) уголовный дело къарагъарнава.
Силисчийрин делилралди, 2023-йисан январдилай 2024-йисан декабрдалди бухгалтер тир дишегьлиди, вичин къуллугъдин дережадикай менфят къачуналди, Тлярата районда авай аялрин бахчадин къуллугъчийриз мажибар тайинардайла, электронный сиягьрик тапан малуматар кутуна. Кьилди къачуртIа, сиягьдик аялрин бахчада кIвалах тийизвай ксарин банкунин реквизитар кутунвай. Тапан документрал асаслу яз, шак физвай бухгалтерди такьатар (аялрин бахчадин къуллугъчийрин мажиб патал чара авунвайбур) къанунсуздаказ масабурун картайриз ракъурна. Санлай къачурла, чуьнуьхнавай пулунин кьадар 2 миллионни 1 виш агъзур манатдилай артух я. Идалайни гъейри, шак физвайдаз талукь яз судди мад са уголовный делодал кIвалахзава – ам 19 миллион манат пул чуьнуьхунихъ галаз алакъалуди я.
«Лезги газет»
