Са касдал яшамиш хьунин агъа кIа­нин кьадардилай тIимил къазанжи гьалтзавай, агьвал тIимил авай хизанривай ва текдиз яшамиш жезвай ватандашривай яшайишдин икьрар кутIуниз жеда.

Гзаф аялар авай хизанриз, СВО-дин иштиракчийриз ва абурун хизанра авайбуруз яшайишдин икьрар кутIунунин артухан ихтиярар ава. Хизанда авайбурал гьалтзавай къазанжи гьисабдайла, демобилизоватнавай СВО-дин иштиракчийрин къазанжияр фикирда кьазвач («Ватан хуьзвайбур» фондунай къачунвай махсус чар гвайла).

Яшайишдин рекьяй куьмекар гунин макьсадрик акатзава:

— кIвалах жагъурунин ва чирвилер къачунин рекье куьмек гун;

— жуван хсуси кар (ИП, хсуси карчивал) ачухуниз 350 агъзур манат кьван пулунин такьатар гузва (тадаракар маса къачуниз, киридиз, харждай маса затIариз);   

— жуван хсуси майишат (ЛПХ) кардик кутуниз 200 агъзур манат кьван такьатар гузва (гьайванар ва я майишатда герек техника маса къачун патал);

— яшайишдин четин гьалар авай дуьшуьшриз талукь яз (лап герек шейэр, парталар ва дарманар маса къачун патал).

МФЦ-да арза вугун патал талукь ватандашрив ихьтин документар хьун герек я:

— арзачидин ва адан хизанда авай вирибурун паспортар;

— хайивилин гьакъиндай аялрин шагьадатнамаяр (эгер къецепатан уьлкведа ханвай аял ятIа, шагьадатнамадихъ таржума хьун герек я);

— эвленмиш хьанвайвилин ва я чара хьанвайвилин гьакъиндай шагьадатнама;

— очный къайдада кIелзавайвилин ва стипендия авани-авачни къалурнавай справкаяр;

— банкунин счетдин реквизитар («Мир» картадин);

— хсуси кар ачухуниз талукь бизнес-план;

— инвалидвал аватIа, ам тестикьарзавай справка;

— алиментрин икьрар (аваз хьайи­тIа). 

Арзадиз 10 йикъан муддатда килигзава. Агьалийривай чпиз къулай тир МФЦ-дин идарайра арза вугуз жеда.

«Лезги газет»