«Лезги газетди» алатай йисан августдин вацра хабар гайивал, Белиж поселокдин чкIизвай гьалда авай пуд лагьай нумрадин юкьван мектеб агалнай. Мектебдин физкультурадин муаллим Девлетхан Мирзебалаева цIийи дарамат эцигун патал кар вилик тухудай десте тешкилна. Ам гьукумдин талукь тир органриз мектебдин цIийи дарамат эцигунин гьакъиндай лазим арзаяр кхьинал машгъул хьана.
РикI шадардай дуьз жаваб агакь тийиз, дарих хьанвай Д. Мирзебалаева, «Лезги газетдин» кьилин редактор Мегьамед Ибрагьимован куьмекдалди Белижда агалнавай мектебдин месэладал РД-дин Гьукуматдин Председателдин заместитель Нариман Абдулмуталибован фикир желбна.
Гьа икI, алатай йисуз райондин администрацияди кьиле тухвай конкурсда заказчикди «ГРЭН» ООО-дин мектеб эцигдай проект хкяна. Гьа и кархана мектеб цIийи кьилелай туькIуьр хъувунин кIвалахривни эгечIна.
ЦIийиз туькIуьр хъувунвай мектеб ачухдалди вилик чун эцигунриз регьбервал гайи прораб Алик Алиевахъ галаз дараматдин къенез гьахьна. Мектеб алай аямдин истемишунрив кьадайвал эцигнава. Ина тарсар тухудай экуь 10 кабинет, сифте куьмек гудай медкабинет, кухня, сифтегьан классра кIелзавай аялриз тIуьн гудай къулай столовой, санузелар, дарамат чими ийидай пич, библиотека, цIаяр кьунин сигнализация кардик ква.
Аялризни муаллимриз къулай шартIар тешкилун патал инаг лазим кьадар мебелдалди, маса тадаракралди, компьютерралди, тIуьн гудай чка чими ва къайи целди, гьакIни маса шейэралди таъминарнава.
Мектебдин гьаятда аялриз переменада ацукьдай 8 куьсри эцигнава, волейбол, баскетбол ва мини-футбол къугъвадай спортдин майданар туькIуьрнава. Анаг 3D-сеткадин жугъунда тунва.
Дараматдин муькуь пата чиле хъуьтуьл резин тунвай баскетболдин майдан ва адан патав воркаут-майдан туькIуьрнава. Гьаятда — эквер, чиле къван (брусчатка) тунва, 500 кв.м майданда къир цанва. ГьакIни мектебдин мулкунин къерехдани санузелар эцигнава. Санлай къачурла, къулай шартIар авай вижевай мектеб хьанва.
29-январдиз цIийикIа туькIуьр хъувунвай мектеб ачухиз атай Дербент райондин кьил Э.Аллагьвердиев кьиле тухванвай кIвалахрин еридилай рази яз амукьна. Ада аялризни муаллимриз цIийи мектеб мубаракна, вад вацран вахтунда мектеб цIийи хъувунин кIвалахар тамамарай эцигунардайбуруз рикIин сидкьидай сагърай лагьана.
Шад мярекатдал аялризни муаллимриз тебрикдин хуш келимаяр Белиж поселокдин кьил Р. Гьабибулаева, муаллим М. Магьмудова ва Н. Гьайдарова лагьана.
Мярекатдиз кIватI хьанвайбурун гуьгьуьлар Белиждин аялрин искусстводин мектебдин кьуьлердай «Кавха» ансамблди, яратмишунрин кIвалин далдамчийри, мектебдин аялри ва муаллимри къалурай концертди генани цицIи авуна.
Мектебдин директордин везифаяр тамамарзавай Н. Асалиевади 3-нумрадин юкьван школадин аялрин ва муаллимрин патай виридаз сагърай лагьана ва цIийи мектебда чирвилерин цIийи кукIушрив агакьдайдахъ инанмишвална.
Къагьриман Ибрагьимов
